“Реал Мадрид” асосий таркиб футболчиси жароҳат олди

“Реал Мадрид”нинг Ла Лига доирасида “Атлетик Билбао”га (0:3) қарши ўйинидан сўнг ҳимоячи Трент Александер-Арнольднинг жароҳат олгани маълум бўлди. Бу ҳақда клуб матбуот хизмати хабар берди.

Расмий маълумотга кўра, футболчи тиббий кўрикдан ўтганидан сўнг унинг чап оёғидаги тўрт бошли сон мушаклари шикастлангани аниқланган. Клуб Трентнинг тикланиш жараёни давомида аҳволи мунтазам кузатиб борилишини билдирган.

Расмий баёнотда футболчининг майдонга қайтиш муддати очиқланмаган бўлса-да, Испания матбуотининг ёзишича, Александер-Арнольд камида икки ой сафдан чиқади. Шу боис у 2026 йил январида бўлиб ўтадиган Испания Суперкубоги баҳсларида майдонга туша олмайди.

Шунингдек, “Реал Мадрид”нинг ўнг қанот ҳимояси бўйича яна бир варианти Дани Карвахаль ҳам жароҳат билан банд. Испаниялик футболчи йил бошида машғулотларга қайтиши кутилмоқда.

Эслатиб ўтамиз, аввалроқ “Барселона” ярим ҳимоячиси Дани Ольмо Испания Ла Лигасининг 19-турида “Атлетико Мадрид”га (3:1) қарши ўйинда олган жароҳати сабаб тахминан уч ҳафта майдонга туша олмаслиги ҳақида хабар берилган эди.