“Реал” Энцо Фернандес билан шахсий келишувга эришди – ОАВ

Лондоннинг “Челси” клуби ярим ҳимоячиси Энцо Фернандес “Реал Мадрид” билан шахсий шартлар бўйича келишувга эришди. Бу ҳақда испаниялик журналист Мигель Серрано хабар берди.

Серранонинг маълум қилишича, “қироллик клуби” раҳбарияти аргентиналик футболчи билан шахсий шартнома шартлари бўйича келишувга эришган.

Шу билан бирга, журналист ҳозирча “Реал Мадрид” ва “Челси” клублари трансфер шартлари бўйича келишувга эришмаганини таъкидлади. Унинг сўзларига кўра, футболчи, унинг агенти Хавьер Пасторе ҳамда “Реал Мадрид” ўртасидаги келишув трансферни 2026 йилги жаҳон чемпионатидан кейин амалга ошириш имкониятини назарда тутади.

Манбага кўра, битимнинг амалга ошиши энди клублар ўртасидаги музокараларга боғлиқ бўлади. Лондонликлар Жаҳон чемпиони учун 120 миллион фунт стерлинггача талаб қилиши мумкин. Шу сабабли, “Реал Мадрид” трансфер қийматини пасайтириш мақсадида футболчи алмашинуви ва қўшимча тўловни ўз ичига олган вариантларни ҳам кўриб чиқмоқда.

Мадрид клуби аргентиналик ярим ҳимоячини марказий чизиқни кучайтириш учун энг мақбул вариантлардан бири сифатида баҳоламоқда.

Маълумот учун, Энцо Фернандес 2025-2026 йилги мавсумда “Челси” сафида Англия Премьер-лигаси доирасида 36 та учрашувда майдонга тушиб, 10 та гол ва 4 та голли узатма муаллифи бўлди.