Рамос “Севиля”ни сотиб олиш бўйича дастлабки келишувга эришди

“Реал Мадрид”нинг собиқ ва Испания терма жамоасининг афсонавий ҳимоячиси Серхио Рамос ўзининг болаликдаги клуби “Севиля”ни сотиб олиш бўйича дастлабки келишувга эришди. Бу ҳақда “Marca” хабар берди.  

Манбага кўра, дастлабки таклиф қиймати 450 миллион еврога баҳоланмоқда. Рамос клуб директорлар кенгашидаги бир нечта асосий акциядорлар билан ният хатини имзолаган. Ушбу ҳужжат музокаралар учун эксклюзив даврни очиб беради ҳамда “Севиля”нинг молиявий ҳолатини чуқур ўрганиш ва пухта текширув ўтказиш имконини яратади. Бу эса якуний келишувни имзолаш йўлидаги муҳим босқич ҳисобланади.

Тажрибали марказий ҳимоячи ушбу лойиҳа доирасида АҚШда жойлашган Five Eleven Capital компаниясини бошқарувчи аргентиналик бизнесмен Мартин Инко билан ҳамкорлик қилмоқда. Инко “Севиля”нинг ҳозирги профессионал футбол директори Антонио Кордон билан яқин ишбилармонлик алоқаларига эга. Молиявий томон эса Гватемала келиб чиқишига эга бўлган ва акциядор ҳамкор сифатида фаолият юритувчи Американинг IDC Ventures инвестиция фонди томонидан қўллаб-қувватланмоқда.

Манбаларнинг таъкидлашича, Рамос ўз таклифининг ҳаётийлигини исботлаб, клубни сотиб олиш бўйича асосий даъвогар сифатида кўрилмоқда. Бошқа манфаатдор томонлар эса молиявий ҳужжатларни батафсил ўрганиб чиққач таклифдан воз кечган.

Қайд этилишича, жорий йилнинг 15 январь куни Серхио Рамос акаси Рене ҳамда адвокат-иқтисодчи Хулио Сенн билан биргаликда акциядорлар ва адвокат Альберто Перес Солано билан бир қатор учрашувлар ўтказиб, ўз ниятларининг жиддийлигини яна бир бор намойиш этган.