Рамос энди рақибини уриб ҳам карточка олмайдиган касб топди

“Реал Мадрид”нинг собиқ сардори Серхио Рамос блогер ва кикбоксчи Эндрю Тейт билан бокс жангида иштирок этади. Бу ҳақда “Moslee” хабар берди.

Манбага кўра, 39 ёшли футболчи ва Эндрю Тейт ўртасидаги жанг Misfits Boxing томонидан ташкил этилган бўлиб, жорий йилнинг 22 август куни Қатар пойтахти Доҳадаги “Лусаил” стадионида бўлиб ўтади. Жанг 88,5 кг вазн тоифасида ўтказилади ва уч дақиқалик олтита раунддан иборат бўлади.

Маълумот учун, 39 ёшли Рамос ҳозирда клубсиз. Унинг сўнгги клуби Мексиканинг “Монтеррей” жамоаси бўлиб, у 2025 йил охирида шартнома тугагач клубни тарк этган эди. Рамос 2005-2021 йилларда “Реал Мадрид” шарафини ҳимоя қилган ва клуб билан бешта Испания чемпионлиги ҳамда тўртта Чемпионлар лигаси бош совринини қўлга киритган. 2021-2023 йилларда эса у “Пари Сен-Жермен” сафида ўйнаб, икки марта мамлакат чемпиони бўлган.

Шунингдек, Рамос Испания терма жамоаси билан 2010 йилги Жаҳон чемпионати ва икки Европа чемпионлигини (2008 ва 2012) қўлга киритган.

Эслатиб ўтамиз, аввалроқ Серхио Рамос ўзининг болаликдаги клуби “Севилья”ни сотиб олиш бўйича дастлабки келишувга эришган эди.