Путин Зеленский билан музокарага тайёр, аммо муаммо бор – Песков

north_east

Зеленскийнинг легитимлиги ўз ўрнида...ми?

Россия Президенти Владимир Путин Украина Президенти Владимир Зеленский билан музокарага тайёр, бироқ Россия Зеленский ҳокимиятини қонуний эмас деб ҳисоблашини ҳам инобатга олиш керак. Бу ҳақда бугун, 18 февраль куни брифингда Россия Президенти матбуот котиби Дмитрий Песков маълум қилди.

Песковнинг сўзларига кўра, Путиннинг шахсан ўзи Зеленский билан музокаралар олиб бориш истаги борлигини бир неча бор билдирган.

“Путиннинг ўзи, агар керак бўлса, Зеленский билан музокара олиб боришини бир неча бор айтган. Шу билан бирга, Зеленскийнинг қонунийлигига эътироз билдириш эҳтимоли ҳақидаги воқеликни инобатга олган ҳолда, келишувларни ҳуқуқий қайд этиш жиддий муҳокама қилинади”, деган Кремль вакили.

Маълумот учун, Украина етакчиси Владимир Зеленскийнинг ваколат муддати 2024 йил 20 майда тугаган. Лекин Украинада уруш давом этар экан, Зеленский давлат раҳбари бўлиб қолади, деган консенсус мавжуд. Шу билан бирга, Путиннинг ўзи сайланишининг қонунийлиги Россия мухолифати томонидан мунтазам равишда сўроқ остига олинади. Бундан ташқари, 2024 йил апрелида Европарламент Европа Иттифоқини Россиядаги президентлик сайловлари натижалари ва Украинанинг Россия томонидан босиб олинган ҳудудларидаги овоз бериш натижаларини тан олмасликка чақирган.

Эслатиб ўтамиз,  14 февраль куни Украина Президенти Владимир Зеленский Мюнхен хавфсизлик конференциясида у гаплашишга тайёр Россиянинг ягона вакили Россия Президенти Владимир Путин эканини айтганди. Шу билан бирга, у Украина АҚШ Президенти Дональд Трамп ва Европа етакчилари билан можарони ҳал қилишнинг умумий режасини келишиб олгандан кейингина буни амалга оширишини таъкидлади.