Путин урушни тугатиш учун шартини айтди

Украина қўшинлари эгаллаб турган ҳудудлардан чиққачгина жанговар ҳаракатлар бутунлай тўхатилади. Бу ҳақда кеча, 27 ноябрь куни Россия Президенти Владимир Путин Қирғизистонга ташрифи якунлари ва Коллектив хавфсизлик шартномаси ташкилоти саммити бўйича матбуот анжуманида сўз очди. 

Нутқи давомида Путин АҚШнинг урушни якунлашга қаратилган “тинчнлик режаси” бўйича музокаралар жараёнини шарҳлаган. Унинг сўзларига кўра, ҳозирда муҳокама қилинаётган ҳужжат лойиҳаси эмас, балки “саволлар тўплами”, холос. 

“Россия АҚШ ва Украина Президентлари ўртасидаги келишувлар асосида тинчлик келишувини имзолашга тайёр”, деган Россия етакчиси. 

Журналистлар саволларига жавобан Путин шуни айтдики, Россия ва АҚШ бу масалаларни Аляскадаги саммитидан олдин ҳам муҳокама қилган.

“Шундан сўнг, 28 пунктдан иборат келишувлар рўйхати пайдо бўлди”, деган Кремль раҳбари. 

Путиннинг сўзларига кўра, кейинчалик АҚШ ва Украина вакиллари Женевада музокаралар ўтказган.

“Мен тушунганим шуки, улар ўзаро келишиб, бу 28 пунктни тўрт алоҳида қисмга бўлишга қарор қилган ва булар бизга етказилди”, деган Россия Президенти.

Ғарб оммавий ахборот воситалари хабар беришича, Женевадаги музокаралар натижасида режанинг мазмуни қайта кўриб чиқилган.

Путин АҚШ томонидан тақдим этилган ҳужжатнинг айрим бандлари “келажакдаги келишувлар асосига қўйилиши мумкин”лигини айтган, бироқ ҳозирда “охирги вариантлар йўқ”лиги сабабли тафсилотларни эълон қилиш ноўринлигини таъкидлаган.

Россия Президенти ушбу ҳужжатни “дипломатик тилда ифодалаш” зарурлигини қайд этган, чунки ҳозирги баъзи бандлар кулгили эшитилади.

“Масалан, Россия Европага ҳужум қилмайди, деган гапни айтиш бошқача, бу биз учун кулгили эшитилади. Биз ҳеч қачон бундай ният қилмаганмиз. Аммо агар улар буни эшитмоқчи бўлса, биз буни расмийлаштирамиз, муаммо йўқ”, деган Путин.

Қайд этиш жоизки, ҳужжатнинг дастлабки версияси бир қатор ҳудудий имтиёзларни талаб қилган ва барча томонлар имзолаганидан кейин жанговар ҳаракатлар тўхташини кўзда тутган.

“Украина қўшинлари эгаллаб турган ҳудудлардан чиққачгина жанговар ҳаракатлар тўхтайди. Бўлмаса, биз тўхтамаймиз ва буни қурол билан амалга оширамиз”, деган Путин матбуот анжуманида. 

Россия Президенти, шунингдек, Украина можаросини ҳал қилиш бўйича якуний қарорлар “асосий халқаро ўйинчилар” томонидан тан олиниши муҳимлигини таъкидлаган. 

Эслатиб ўтамиз, аввалроқ Украина Президенти Владимир Зеленский АҚШ раҳбари Дональд Трамп билан учрашишга тайёрлигини, аммо бу учрашувда Европа ҳамкорлари ҳам қатнашиши кераклигини билдирганди.