Путин урушни ҳозирги фронт чизиғида тўхтатишни таклиф қилди – ОАВ

Россия Президенти Владимир Путин Украина билан тўқнашувни ҳозирги фронт чизиғи бўйича тўхтатишни таклиф қилди. Бу ҳақда манбаларга таяниб, “Financial Times” хабар берди.

Нашрнинг вазиятдан хабардор манбаларига кўра, Россия Президенти АҚШ етакчиси Дональд Трамп билан тинчлик келишувига эришиш йўлида ҳарбий ҳаракатларни ҳозирги чизиқда тўхтатишни таклиф қилган.

Хабарда айтилишича, жорий йил апрель ойи бошида Санкт-Петербургда Дональд Трампнинг махсус вакили Стивен Уиткофф билан учрашувда Владимир Путин Москва Киев назорати остида қолаётган тўртта ҳудуддаги даъволардан воз кечишга тайёрлигини билдирган. У фақат Россия ҳозирда назорат қилаётган ҳудудларни ўзида сақлаб қолишни таклиф қилган.

Бироқ FT манбаларининг таъкидлашича, агар АҚШ Россиянинг Кремлдаги асосий геосиёсий талабларига рози бўлса, Россия Президенти Донецк, Луганск, Херсон ва Запорожье вилоятларида тўлиқ назорат ўрнатиш талабидан воз кечишга тайёр. Масалан, АҚШ Қрим устидан Россия назоратини тан олса ва Украина НАТОга аъзо бўлишига йўл қўймаса. 

“Мураккаб иш олиб борилмоқда. Биз америкаликлар билан музокаралар олиб боряпмиз. Бу иш қийин ва кўп вақт талаб қилади, шунинг учун дарҳол натижаларни кутиш мушкул. Бундан ташқари, бу музокараларни очиқ олиб бориб бўлмайди”, дейди Кремль расмий вакили Дмитрий Песков.

FT маълумотларига кўра, Дональд Трамп Россия ва Украина ўртасида 30 апрелгача келишувга эришишни истамоқда. Бу орқали у президентлик фаолиятининг дастлабки 100 кунида тинчлик ўрнатиш миссиясини амалга оширганини эълон қилмоқчи.

Эслатиб ўтамиз, аввалроқ Кремль Россия жамиятини узоқ муддатли милитаризацияга ва НАТО билан эҳтимолий можарога тайёрланаётгани ҳамда мазкур жараёнда Украина босқинини оқлаш учун илгари қўлланилган нарративлар яна ишга солинаётгани хабар қилинган эди. Хусусан, Россия амалдорлари ва тарғиботчилари томонидан илгари Украина билан боғланиб айтилган “нацизм” айбловлари энди нафақат Киевга, балки Европа давлатларига ҳам тобора кўпроқ қаратилмоқда.