Путин Украинадаги уруш якунига етаётганини айтди (видео)

Россия Президенти Владимир Путин Украинадаги можаро якунланишга яқинлашаётганини айтди. У бу ҳақда жорий йилнинг 9 май куни Ғалаба куни муносабати билан Москвага келган хорижий лидерлар билан икки томонлама учрашувлар якунлари бўйича журналистлар билан мулоқотда маълум қилди.

Путиннинг айтишича, Ғарб элиталари Украина қўли билан Россияга қарши уруш олиб бормоқда ва айнан улар можарони келтириб чиқарган. Унинг таъкидлашича, Украина Европа Иттифоқи билан ассоциация келишувини имзолашни режалаштирган пайтда Россия манфаатлари инобатга олинмагани ҳамда НАТОнинг шарққа кенгайиши можарога замин яратган.

Россия Президенти 2022 йилда “махсус ҳарбий операция” бошланганидан кейин Истанбулда Россия ва Украина ўртасида келишув лойиҳасини эслади.

Путиннинг сўзларига кўра, шундан кейин Франция Президенти Эммануэль Макрон унга қўнғироқ қилиб, “Украина бундай тарихий ҳужжатни бошига тўппонча қўйилган ҳолда имзолай олмайди”, деган. Путин эса “нима қилиш керак?” деб сўраганида, Макрон “қўшинларни Киевдан олиб чиқиш керак” деб жавоб берганини айтди.

Унинг таъкидлашича, шундан кейин Буюк Британиянинг ўша пайтдаги бош вазири Борис Жонсон бу келишувни “адолатсиз” деб атаб, имзолаш мумкин эмаслигини билдирган.

“Кейин қарши туришни кучайтиришди ва у ҳозиргача давом этмоқда. Менимча, масала якунига етиб бормоқда, аммо бу жуда жиддий масала”, деган Путин.

Россия Президентининг фикрича, Ғарб Россиянинг “қаттиқ мағлубияти”ни кутган, аммо бу амалга ошмаган. Шунинг учун улар бошлаб қўйган сиёсатдан чиқиб кета олмаяпти.

Путин шунингдек, Украина Президенти Владимир Зеленский Словакия Бош вазири орқали шахсий учрашув ўтказиш таклифини юборганини айтди. Унинг сўзларига кўра, бундай учрашув Москвада ёки учинчи давлатда фақат узоқ муддатли тинчлик келишуви бўйича якуний келишувларга эришилган тақдирдагина ўтказилиши мумкин.

Путин можарони ҳал қилиш, аввало, Россия ва Украина иши эканини, бироқ АҚШнинг ҳозирги маъмурияти воситачилик қилаётгани учун миннатдор эканини ҳам таъкидлаган.