Путин Трампга жавоб қайтарди

Россия Президенти Владимир Путин кеча, 1 август куни беларуслик Александр Лукашенко билан Валаам монастирига қўшма ташрифи чоғида бир қанча муҳим баёнотлар берди. 

Истанбулдаги Украина-Россия музокараларининг учинчи раунди ҳақида гапирар экан, Путин, айниқса, тинчликка интилиш контекстида уларнинг муҳимлигини қайд этди.

“Мен [учинчи босқич натижаларини] умуман ижобий деб баҳолайман”, деди Президент унинг инсонпарварлик жиҳатини – юзлаб одамларнинг ўз ватанига қайтишини таъкидлаб.

Путиннинг айтишича, Россия гуманитар сабабларга кўра минглаб ҳалок бўлган украиналик аскарларнинг жасадларини топширган ва бунинг эвазига “бир неча ўнлаб йигитларники”ни қабул қилган.

Шунингдек, Россия етакчиси АҚШ Президенти Дональд Трампнинг ундан ҳафсаласи пир бўлгани гапларига ҳам изоҳ берди. Путин Трампнинг номини тилга олмаган бўлса ҳам “барча умидсизликлар ҳаддан ташқари кутишдан келиб чиқади”, деб таъкидлаб, “омма олдида эмас, балки хотиржам, музокаралар жараёнининг тинчлигида” пухта музокаралар олиб бориш зарурлигини айтди.

Путин ўтган йилнинг июнь ойида Россия Ташқи ишлар вазирлиги раҳбарияти билан бўлиб ўтган учрашувда Россиянинг мақсадларини эслаб, асосий вазифа – “бу инқирозни келтириб чиқарган сабабларни йўқ қилиш”ни таъкидлади.

Бундан ташқари, у Украина томонининг Россия ва Украина хавфсизлигини “умумий Европа хавфсизлиги контекстида” кўриб чиқиш таклифини ижобий баҳолади. Муҳим масалалар қаторида Путин гуманитар компонент – рус тилининг мақоми ва Украинада “мустақиллик ва православ черковининг ривожланиши учун муносиб шароитлар”ни ҳам таъкидлади.

Путин қўшинлар биринчи серияли “Орешник” мажмуасини олганини ҳам эълон қилди. 

“Биринчи серияли ракета қўшинларга етказилди. Энди серия ишлай бошлади”, деди у.

Президентнинг сўзларига кўра, россиялик ва беларуслик ҳарбий мутахассислар тизимнинг бўлажак позициялари учун жойларни танлаб олган ва ҳозирда бу позицияларда тайёргарлик кўрилмоқда.

Европадаги вазиятга тўхталар экан, Путин Европа Иттифоқи ҳақидаги қарашлар эволюциясини қайд этди. Агар илгари у “иқтисодий гигант, аммо сиёсий митти” деб аталган бўлса, бугун Россия раҳбарининг сўзларига кўра, “унда суверенитет умуман мавжуд эмаслиги аён бўлган”.