Путин Трамп билан деярли 1,5 соат телефонда гаплашди

Россия Президенти Владимир Путин бугун, 12 февраль куни Америка Қўшма Штатлари етакчиси Дональд Трамп билан музокара ўтказди. Икки давлат раҳбарларининг телефон орқали мулоқоти ҳақида Россия Президенти матбуот котиби Дмитрий Песков брифингда маълум қилди.

Бу Россия ва АҚШ раҳбарларининг сўнгги уч йилдаги илк суҳбати бўлгани айтилмоқда. Россия Президенти Трампдан олдинги президент Жо Байден билан охирги марта айнан бир кунда – 2022 йилнинг 12 февралида гаплашган.

“Президент Путин ва АҚШ Президенти Дональд Трамп яқинда телефон орқали мулоқотни якунлади. Бу жуда узоқ телефон суҳбати эди, деярли бир ярим соат давом этди”, деди Песков. 

Билдирилишича, Трамп сўнгги ҳафталарда Россия Президенти билан гаплашиш режаларини бир неча бор таъкидлаган. Америка раҳбари Украинадаги можарога катта эътибор қаратган ва уни тугатишга ёрдам бериш истагини билдирган.

Россия Президенти эса Трампнинг Москва ва Вашингтон биргаликда ишлаши кераклиги ҳақидаги фикрига қўшилишини айтган.

Россия ва АҚШ етакчилари телефон суҳбатида Яқин Шарқдаги келишув, Эрон ядро дастури ва Россия-Америка муносабатларини муҳокама қилган.

Кремль вакилининг сўзларига кўра, Россия етакчиси АҚШ Президентини Москвага таклиф қилган. Путин ва Трамп шахсий учрашув ташкил этишга келишиб олган.

“Россия ва АҚШ Президентлари Владимир Путин ва Дональд Трамп икки давлатнинг судланган фуқароларини алмашиш масаласини муҳокама қилди, Вашингтон ўз мажбуриятлари бажарилишини кафолатлади”, деди Песков.

Шунингдек, Путин ва Трамп Россия ва АҚШ фуқароларини алмашиш билан боғлиқ масалаларни муҳокама қилган.

“АҚШ Президенти Америка томони эришилган барча келишувларни бажаришига ишонтирди”, деди Песков.

Унинг айтишича, Путин Трамп билан суҳбатда америкалик расмийларни Россияда қабул қилишга, жумладан, Украина муаммосини ҳал қилишга тайёрлигини маълум қилган. 

“Украинадаги келишув мавзуси муҳокама қилинди. Президент Трамп ҳарбий ҳаракатларни тезда тўхтатиш ва муаммони тинч йўл билан ҳал қилишга чақирди”, деди Кремль вакили.

Путин, ўз навбатида, можаронинг асл сабабларини йўқ қилиш зарурлигини эслатиб ўтди ва Трамп билан “тинч музокаралар орқали узоқ муддатли келишувга эришиш мумкин” деган фикрга қўшилди.

Расмий маълумотларга кўра, бу Путин ва Трамп ўртасидаги 2020 йил июлидан бери биринчи марта бўлиб ўтган суҳбатдир. Аввалги суҳбат Трампнинг аввалги президентлик даврида бўлиб ўтган.

Шу билан бирга, бу Россия Федерацияси ва АҚШ раҳбарларининг 2022 йил февралидан бери биринчи суҳбатидир (ўшанда Путин Жо Байден билан гаплашган эди).

Эслатиб ўтамиз, АҚШ Президенти Дональд Трамп 8 февраль куни “The New York Post” газетасига берган интервьюсида Россия Президенти Владимир Путин билан телефон орқали гаплашиб, Россия-Украина урушини тугатиш бўйича музокаралар олиб боришга ҳаракат қилганини айтганди. Уларнинг телефонда неча марта гаплашгани сўралганда, Трамп “Мен бу ҳақда айтмасликни афзал кўраман” деган. Трампнинг таъкидлашича, Путин жанг майдонидаги ўлимлар ҳақида “ҳақиқатан ҳам қайғуради”.