Путин шерикларини “Толибон” билан ҳамкорликка чорлади

Афғонистонда кўплаб террорчи гуруҳлар экстремизм ғояларини тарқатишга ҳаракат қилмоқда, аммо “Толибон” муваққат ҳукумати терроризм ва наркотрафикка қарши ҳамкорликка тайёр. Бу ҳақда кеча, 9 октябрь куни Россия Президенти Владимир Путин Тожикистоннинг Душанбе шаҳрида ўтказилган “Россия – Марказий Осиё” иккинчи саммитида сўз очди.

Путинга кўра, Россия “Толибон” муваққат ҳукуматининг террорчиликка қарши курашиш йўлидаги саъй-ҳаракатларини қўллаб қувватлайди. Унинг қўшимча қилишича, “Толибон” бошқа минтақа вакиллари билан бу йўналишда ҳамкорлик қилишга тайёр. 

Яқин Шарқдаги можаро ҳақида гапирар экан, Путин Ғазо секторидаги фожиали ҳолатни “инқироз” деб атаган. У АҚШ Президенти Дональд Трампнинг тинчлик ташаббусларини ижобий баҳолаб, Россия бу саъй-ҳаракатларни амалда қўллаб-қувватлаётганини урғулаган. 

Путинга кўра, Яқин Шарқ муаммосини фақат сиёсий-дипломатик йўл билан ҳал қилиш мумкин, узоқ муддатли барқарорлик учун эса мустақил Фаластин давлати тузилиши зарур.

Шунингдек, у Эрон ядровий дастури масаласида ҳам фақат дипломатик йўл билан келишувга эришиш мумкинлигини айтиб, Россия Эрон ва Халқаро атом энергияси агентлиги (МАГАТЭ) ўртасидаги мулоқотни қўллаб-қувватлашини билдирган.

Путин ўз нутқини якунлар экан, саммитда қабул қилинган коммюнике ва ҳаракатлар режаси Россия билан Марказий Осиё давлатлари ўртасидаги дўстона, ўзаро фойдали муносабатларни янада мустаҳкамлашга хизмат қилишига ишонч билдирган. 

Эслатиб ўтамиз, аввалроқ Европа Иттифоқи Россия Президенти Владимир Путинни ҳибсга олмагани учун Тожикистонни Халқаро жиноий суд (ХЖС) талабларини бажармаганликда айблаганди.