Путин Назарбоев билан учрашди (видео)

Россия Президенти Владимир Путин кеча, 27 декабрь куни Қозоғистоннинг биринчи президенти Нурсултон Назарбоев билан учрашув ўтказди. Бу ҳақда Кремль матбуот хизмати хабар берди.

Россия раҳбари Қозоғистоннинг собиқ президентини Кремль саройида қабул қилган. Суҳбат тафсилотлари ошкор этилмаган.

Путин ва Назарбоевнинг Москвадаги сўнгги учрашуви жорий йилнинг май ойида бўлиб ўтган. Ундан аввал Қозоғистоннинг собиқ етакчиси Россияга 2024 йилнинг декабрь ойида Президент билан учрашиш учун ташриф буюрган эди.

2019 йил 19 март куни Нурсултон Назарбоев Қозоғистон президенти ваколатларини муддатидан олдин тўхтатишини эълон қилган. У бу лавозимни 1991 йилдан буён эгаллаб келган. Давлат раҳбари вазифалари Сенат раиси Қосим-Жўмарт Тўқаевга ўтган. Тўқаев расман 2019 йил 12 июнь куни Президент лавозимига киришган.

2022 йилнинг январь ойида мамлакатда оммавий норозилик намойишлари фонида Тўқаев Назарбоевни Хавфсизлик кенгаши раиси лавозимидан четлатган ва ўша ойда “Нур Отан” партиясига раҳбарликни ҳам ўз қўлига олган. Шу йилнинг сентябрь ойида Президент пойтахт номини яна Остона деб ўзгартириш тўғрисидаги фармонни имзолаган.

2022 йил ёзида ўтказилган референдум натижасида Қозоғистон Конституциясидан биринчи президентнинг алоҳида мақомини белгиловчи нормалар чиқариб ташланган.

Эслатиб ўтамиз, аввалроқ “Проект” суриштирув нашри Россия Федерал қўриқлаш хизмати Москвадаги Чумчуқ тепаликларида жойлашган ҳашаматли дачаларни юқори мартабали сиёсий арбоблар ва ҳукумат билан боғлиқ бизнесменларга ижарага бераётгани ҳақида хабар чоп этганди. Уйлардан бири Назарбоевга тегишли. У Мичуринск проспектида жойлашгани аниқланган.