Путин МДҲдаги қонуний ҳукуматни бузишга уринишларни башорат қилди

Баъзи давлатлар қонуний ҳукуматни, анъанавий қадриятларни ва умуман Мустақил Давлатлар Ҳамдўстлиги (МДҲ) мамлакатларидаги вазиятни бузишга ҳаракат қилмоқда. Бу ҳақда Россия Президенти Владимир Путин бугун, 8 ноябрь куни МДҲ Хавфсизлик кенгаши котибларининг Москвада ўтаётган йиғилиши иштирокчиларига йўллаган видеомурожаатида маълум қилди. 

“Глобал беқарорлик Евроосиёга ҳам прогноз қилинмоқда. Бундан ташқари, айрим давлатларнинг хатти-ҳаракатлари бевосита МДҲ мамлакатларидаги қонуний ҳокимият, ижтимоий барқарорлик ва анъанавий қадриятларга путур етказиш, анъанавий яқин савдо, ҳамкорлик ва маданий алоқаларимизни бузишга қаратилган”, дейди у.

Путиннинг қайд этишича, МДҲ мамлакатлари учун терроризм ва уюшган жиноятчилик, гиёҳванд моддаларнинг ноқонуний айланиши ва ноқонуний миграция, радикализм ва экстремизм каби умумий таҳдидлар, шунингдек, иқтисодий, ахборот, технологик ва биологик хавфсизлик соҳасидаги хавфлар сақланиб қолмоқда.

“Буларнинг барчаси нафақат келишилган жамоавий жавоб, балки катта профилактика ишларини ҳам талаб қилади. 

Хусусан, МДҲ ва бутун жаҳондаги вазиятни чуқур ва ҳар томонлама ўрганиш, устувор йўналишларни аниқ белгилаш, стратегик режалаштириш ҳужжатларини ўз вақтида тузатиш учун хавфсизлик кенгашларининг прогнозлаш, ахборот-таҳлилий салоҳиятидан тўлиқ фойдаланиш муҳим”, дейди Россия раҳбари.

Россия Президенти Хавфсизлик кенгашлари орқали ҳамкорлик бундан буён ҳам МДҲ давлатларининг барқарорлиги ва хавфсизлигини мустаҳкамлашга, умумий мақсадларга эришиш учун келишилган ёндашувларни ишлаб чиқишга хизмат қилишига ишонч билдирган.