Путин инглиз тилини таржимонларни тузатадиган даражада яхши билади – Кремль

Россия Президенти Владимир Путин инглиз тилини шу қадар яхши тушунадики, у тез-тез ўз таржимонларини тузатади. Бу ҳақда Кремль матбуот котиби Дмитрий Песков маълум қилди.

Путин бугун Аляскага етиб келганидан сўнг аэропортдан учрашув жойи бўлган ҳарбий базагача АҚШ Президенти Дональд Трамп билан бирга унинг лимузинида кетганди. Бу шуни кўрсатадики, у америкалик мавқедошини Трампнинг президент лимузинида бирга саёҳат қилганида тушуна олган.

Россиянинг ТАСС ахборот агентлигининг Песковга таяниб ёзишича, жорий йил май ойида икки давлат етакчилари телефон орқали гаплашганида Путин таржимони Трампнинг гапини унга таржима қилиб бермасдан туриб, мавқедоши нима деганини тушунган. 

Россиянинг “Известия” газетасига кўра, 2017 йилда Песков Путин инглиз тилини “деярли тўлиқ” тушунишини ва ҳаттоки таржимонларни тўғрилашини айтган эди.

“Мен ўзим ҳам узоқ вақтдан бери энг юқори даражада таржима қилганман, шунинг учун бу қандай стресс эканлигини биламан. У “сафарда” бўлганида, Путин “кўпинча инглиз тилида гапиради, лекин музокаралар олиб борилаётганда ва расмий учрашув бўлиб ўтаётганда, албатта, у таржимонлар орқали мулоқот қилади”, деган Песков.

Маълумот учун, айни дамда Трамп ва Путин Аляскадаги Эльмендорф-Ричардсон ҳарбий базасида “учга-уч” форматда музокара ўтказмоқда. Америка вакиллари сифатида Трамп билан бирга Давлат котиби Марко Рубио ва Президентнинг махсус вакили Стивин Уиткофф иштирок этяпти. Россия томонидан “учга-уч” форматдаги Трамп билан музокараларда Путин билан бирга Ташқи ишлар вазири Сергей Лавров ва Президент ёрдамчиси Юрий Ушаков қатнашяпти.

Тарихий учрашувни “QALAMPIR LIVE” каналида жонли кузатиб боринг.