ПСЖнинг ЧЛдаги ғалабасидан сўнг Францияда мухлислар тўполон қилди (видео)

Кеча, 30 май куни Чемпионлар лигаси финал учрашувида “Пари Сен-Жермен” (ПСЖ) Лондоннинг “Арсенал” клуби устидан ғалаба қозонганидан кейин полиция ходимлари ва футбол мухлислари ўртасида юз берган тўқнашувлар оқибатида Францияда 416 киши ҳибсга олинди. Бу ҳақда Франция Ички ишлар вазири Лоран Нуньеснинг баёнотига таяниб, “Le Figaro” хабар берди.

Энг кўп қўлга олинганлар Париж шаҳрида қайд этилган – 283 киши. Вазирнинг маълум қилишича, Франциянинг 15 та шаҳрида турли инфратузилма объектларига зарар етказилган. Ренн, Страсбург, Клермон-Ферран ва Гренобль шаҳарларида дўконларни талон-торож қилиш ҳолатлари кузатилган.

Чемпионлар лигаси финали Будапештда бўлиб ўтди. Ўйин трансляцияси, шунингдек, ПСЖнинг уй аренаси – “Парк де Пренс” стадионида ҳам ташкил этилди. ИИВ таъкидлашича, фанатлар ва полиция ўртасидаги тўқнашувлар ҳали ўйин бошланишидаёқ, 150 га яқин киши Париж стадионига куч билан ёриб киришга уринган пайтда бошланган. “Le Figaro” маълумотларига кўра, оломон полициячиларга қарата пиротехника воситаларини отган, полиция эса аренага бостириб кирмоқчи бўлганларни ортга чекинтирган.

Тўқнашувлар учрашув якунланганидан кейин ҳам давом этган. Полиция фанатларни тарқатиш учун кўзни ёшлатувчи газдан фойдаланган. “Парк де Пренс” атрофидаги тартибсизликлар оқибатида нонвойхона ва ресторанга шикаст етган, тўқнашув қатнашчилари велосипедлардан баррикадалар (тўсиқлар) қурган. Бир неча юз киши Париж айланма автомобиль йўлини (Périphérique) тўсиб қўйиб, ундаги ҳаракатни вақтинчалик фалаж қилган. Оқибатда йўл-транспорт ҳодисаси юз бериб, скутер ҳайдовчиси ва унинг йўловчиси жароҳатланган. Елисей майдони ҳудудида эса фанатлар велосипедларга ўт қўйган.