Президентдан “ҳайфсан” олган Абдуллаев ўрнига Сидиқов тайинланди

Баҳодиржон Сидиқов “Ўзбекнефтгаз” АЖ бошқаруви раиси лавозимига тайинланди. Бу ҳақда Вазирлар Маҳкамаси нашри хабар берди. 

У бунгача:

• 2009−2010 йилларда ва 2017 йилда “Нефтегазинвест” масъулияти чекланган жамият директори;
• 2017−2018 йилларда “Ўзбекнефтгаз” АЖ раиси ўринбосари;
• 2018−2019 йилларда Вазирлар Маҳкамаси Геология, ёқилғи-энергетика комплекси, кимё, нефть-кимё ва металлургия саноати масалалари ахборот-таҳлил департаментининг мудири;
• 2019-2020 йил “Ўзбекнефтгаз” АЖ раиси лавозимларида ишлаган.

Тайинловга қадар Баҳодиржон Сидиқов Олмалиқ кон-металлургия комбинатида "Ёшлик" конини ўзлаштириш бўйича лойиҳа бюроси раҳбари лавозимида ишлаб келаётган эди.

“Ўзбекнефтгаз”ни эса 2020 йилнинг январидан буён Меҳриддин Абдуллаев бошқариб келган. 

2022 йилнинг 15 декабрь куни Президент Шавкат Мирзиёев раислигида тадбиркорлик ва саноатни ривожлантириш, аҳоли бандлигини таъминлаш чора-тадбирлари юзасидан ўтказилган видеоселектор йиғилишида мамлакатдаги энергетик инқироз сабаб Абдуллаевга “ҳайфсан” берилди. 

2023 йилнинг 16 январь кунт Президент раислигида ўтган навбатдаги селекторда Меҳриддин Абдуллаев лавозимидан озод этилиб, унга вазифасини бажарувчи лавозимида 3 ой синов муддати белгиланди. 

2023 йил март ойи бошида имзоланган президент қарорига асосан, 31 та йирик давлат корхонаси, хусусан “Ўзбекнефтгаз”нинг давлат акция пакетлари бўйича акциядорлик функцияси Президент ҳузуридаги Стратегик ислоҳотлар агентлигига ўтказилди.