Президент ёзувчи Жавлон Жовлиев ва китобхон оилага Тошкентдан уй совға қилди (видео)

Президент Шавкат Мирзиёев ёзувчи Жавлон Жовлиев ва китобхон оилага Тошкент шаҳридан уй совға қилди. Бу ҳақда Президент бугун, 21 октябрь куни Қашқадарёга сафари доирасида масъулларга топшириқ берди.

“Мана шу Тил байрами кунини нишонлашимизда Абдулла Ориповни эслашимиз табиий, деб ўйлайман. Мен ҳар сафар зиёлилар билан учрашсам, менга Эркин Воҳидов, Ҳалима Худойбердиева, Абдулла Орипов етишмайди, дейман”, дейди Президент.

Шунингдек, Ўзбекистон етакчиси юқорида номи келтирилагн учала шоир билан сирдош бўлганини, Абдулла Орипов билан Зомин семинарини ташкил қилганини айтган.

“Мен уларнинг учаласи билан ҳам сирдош бўлганман. Эркин Воҳидов билан кундузи учрашиш мумкин эмас эди, кечалари учрашиб, пиёда юрардик. Абдулла Орипов билан Зомин семинарини ташкил қилганман. Ҳеч ким топшириқ бермаган, шароит ҳам, имконият ҳам йўқ эди. Вагон қўйиб, ёшларни йиғардик. Ҳалима Худойбердиева билан ҳам шундай дардкаш эдик”, дейди Президент.

Шу билан бирга, Президент ҳозирги давр бошқача эканини, тилга бўлган эътибор, эҳтиром миллатга бўлган эҳтиром, ўзлиикка бўлган эҳтиром эканини қайд этган.

“Мана, “ўзлигимизники, ўзимизники” деган гапларни юзага чиқардим мен. Нимага десангиз, одамлар унутиб юборяпти-да, бу осмондан тушган деб ўйлайди. Бу осмондан тушгани йўқ. Чимда шундай шароитлар бўлиши – иқтисодиёт барқарорлигидан, юртда тинчлик борлигидан далолат”, дейди Ўзбекистон етакчиси.

Бундан ташқари, Шавкат Мирзиёев бир пайтлар китоб дўконлари бўлмаганини йодга олган.

“Бир пайтлар китоб дўконлари йўқ эди. Китоб ёзишни унутиб юборган эдик, шароит йўқ эди. Талаб бўлгани учун дўкон кўпайди, кутубхона кўпайди. Одамлар китоб ўқишга шашт билан киришди, ота-бобосидан қолган меросни тиклади. Очиқ гап, чарчаган эдим. Сизларни кўриб, чарчоқларим ҳам чиқиб кетди”, дейди Ўзбекистон Президенти.

Шунингдек, Президент ёш ёзувчи Жавлон Жовлиевнинг ижодий меҳнатини алоҳида эътироф этиб, унга Тошкент шаҳридан икки хонали уй ажратиш бўйича топшириқ берган. Республика “Китобхон оила” танловида совриндор бўлган оилага ҳам пойтахтдан икки хонали уй бериш топширилган.