Португалия Роналду учун хайрлашув учрашуви ташкил қилади

Португалия футбол федерацияси (ПФФ) Криштиану Роналду терма жамоадаги фаолиятини якунлаш ҳақида қарор қабул қилганидан сўнг футболчи билан хайрлашди. Шунингдек, ташкилот унинг шарафига тантанали хайрлашув маросимини ўтказишга ваъда берди. Бу ҳақда федерацияси матбуот хизмати хабар берди.

Аввалроқ, 41 ёшли Роналду Португалия терма жамоасидаги фаолиятини якунлаётганини эълон қилган эди.

“Барчаси учун раҳмат, сардор! Бу ер доимо сенинг уйинг бўлиб қолади! 1000-голинг сари олға! Криштиану Роналду Португалия номини юксалтирди ва унинг изидан боришни орзу қиладиган ёш авлодларга илҳом бағишлади. Кўпчилик учун у барча даврларнинг энг яхши футболчисидир”, дейилади федерация баёнотида.

Шунингдек, федерация футболчи билан муносиб тарзда хайрлашиш ниятида эканини таъкидлади.

“Федерация муносиб ҳурмат кўрсатилмасдан хайрлашувга йўл қўймайди. Биз Криштиану Роналдунинг буюк фаолиятини ёдга олиш учун махсус тадбир ташкил этишга қатъий қарор қилганмиз”, дея таъкидлади ташкилот.

Маълумот учун, Роналду 2016 йилда Португалия билан Европа чемпиони бўлган. У миллий терма жамоалар тарихида энг кўп ўйин ўтказган (234) ва энг кўп гол урган (146) футболчи ҳисобланади.

Беш карра “Олтин тўп” соҳиби, беш карра Чемпионлар лигаси ғолиби бўлган Роналду расмий учрашувларда киритилган голлар сони бўйича жаҳон рекордчиси ҳамдир. Айни пайтда у Саудия Арабистонининг “Ал-Наср” клубида тўп тепмоқда. Фаолияти давомида “Спортинг”, “Манчестер Юнайтед”, “Реал Мадрид” ва “Ювентус” клубларида ҳам ўйнаган.

Эслатиб ўтамиз, аввалроқ Криштиану Роналду Португалия терма жамоасидаги фаолиятини якунлаши ҳақида хайрлашув мактубини ёзганди.