Португалия ҳам Фаластинни расман тан олди

Португалия Ташқи ишлар вазири Паулу Ранжел кеча, 21 сентябрь куни ўз мамлакати Фаластин давлатини расман тан олганини эълон қилди. Бу ҳақда вазирнинг баёнотига таянган ҳолда "SIC Notícias" телеканали хабар берди.

Вазирга кўра, Исроил–Фаластин можаросида узоқ муддатли ва адолатли тинчликка эришишнинг ягона йўли низоларни якунлаш ва келишувга эришишдир.

Ранжел Португалия Исроил давлатини ҳам тан олишини алоҳида қайд этган. Шунингдек, у Португалия ва Исроил халқлари ўртасидаги “дўстлик”ни тилга олиб, 7 октябрь куни ҲАМАС томонидан содир этилган ҳужумларни кескин қоралаган. Вазир, шунингдек, ҲАМАС қўлида қолаётган исроилликларни дарҳол озод қилишни, ҳалок бўлганларнинг жасадларини эса оилаларига топширишни талаб қилган. 

Худди шу куни Канада, Австралия ва Буюк Британия ҳам Фаластин давлатини тан олганини маълум қилди. Буюк Британия Бош вазири Кир Стармер бу қарор ҲАМАС учун “мукофот эмас”лигини таъкидлаб, уларга Фаластин ерларида жой йўқлигини айтган. Австралия Бош вазири Энтони Альбанезе ва Канада ҳукумати раҳбари Марк Карни ҳам ҲАМАСнинг ҳаракатларини танқид остига олган.

Исроил Президенти Ицхак Герцог эса бу қарорларни танқид қилиб, уларнинг на бирор фаластинликка ёрдам беришини, на гаровдагиларни озод қилишга хизмат қилишини айтган. 

Қайд этиш жоиз, бугунги кунга келиб Фаластин давлатини БМТга аъзо 151 давлат расман тан олган. 95 та мамлакатда Фаластиннинг элчихоналари ва доимий ваколатхоналари фаолият юритмоқда. 

Маълумот учун, можаро 2023 йилнинг 7 октябрида кескинлашганди. Ўша куни ҲАМАС Исроилга кенг кўламли ҳужум уюштириб, тахминан 1200 кишини ўлдирган ва 250 дан ортиқ одамни гаровга олган. Исроил бунга жавобан уруш эълон қилди. Ғазо секторидаги жангларда ҳозирга келиб 65 мингдан ортиқ фаластинлик ҳалок бўлган, 166 мингдан ортиғи яраланган. 

Эслатиб ўтамиз, аввалроқ Франция Президенти Эммануэль Макрон ўнта давлат вакиллари Бирлашган Миллатлар Ташкилотида ўтказиладиган конференция давомида Фаластинни давлат сифатида расман тан олишини айтганди.