Польша украиналик қочқинлар учун шартларни кучайтирмоқда

Польша ҳукумати Украинадан келган фуқаролар учун мамлакатда бўлиш шартларини кучайтирмоқда. Бу ҳақда “Deutsche Welle” хабар берди.

Маълум қилинишича, Польша Президенти Кароль Навроцкий қочқинларни ҳимоя қилишга оид махсус дастурларни узайтирувчи қонунни имзолаган. Бироқ ҳужжат уларнинг мамлакатда қолиш шароитларини чеклайди. Расмийларнинг айтишича, 2026 йилнинг 4 мартидан кейин бу махсус ҳимоя тўлиқ тугайди.

Янги қонунга кўра, чет элликлар, жумладан, украиналикларнинг болалари учун нафақа фақат уларнинг ота-оналари Польшада ишласа ва солиқ тўласа берилади. Шунингдек, бола Польшада мактаб ёки боғчага қатнаши шарт бўлади (ногиронлар бундан мустасно). Ишламайдиган украиналиклар айрим бепул тиббий хизматлар ва бошқа имтиёзлардан ҳам фойдалана олмайди. 

Нашрга кўра, 2026 йилнинг мартидан кейин украиналикларга бошқа барча муҳожирлар сингари умумий қоидалар бўйича муносабатда бўлинади.

Масала Польшада сиёсий тортишувларга сабаб бўлган. Чунки охирги президентлик сайловида ҳокимиятга келган Навроцкий (ўнг консерватив “Ҳуқуқ ва адолат” партияси вакили) ўзини АҚШ Президенти Дональд Трампга ўхшаш сиёсатчи сифатида кўрсатмоқда. У август ойида украиналарга бериладиган ижтимоий ёрдамни узайтириш лойиҳасини ҳам тўсиб қўйганди.

Навроцкий шу йилнинг 29 сентябрида парламентга яна икки янги қонун лойиҳасини тақдим этиши кутилмоқда. Улардан бири – чет элликлар, жумладан, украиналиклар Польша фуқаролигини олиш учун зарур бўлган муддатни 2 йилдан 10 йилгача узайтириш ҳақида. 

Эслатиб ўтамиз, аввалроқ Польша ҳукумати фуқароларига Беларусни зудлик билан тарк этиши, шунингдек, республика ҳудудига саёҳатдан тийилиши кераклигини таъкидлаганди.