Пластик картадан пул “ухлатганлик” учун жазо кучайтирилмоқда

Фуқароларнинг банк пластик карталаридан пулларини ўғирлаганлик учун жазо оғирлаштирилади. Жиноят кодексига тегишли ўзгартиришларни киритиш тўғрисидаги қонун лойиҳаси бугун, 9 март куни Олий Мажлис Қонунчилик палатаси мажлисида кўриб чиқилди.

Қонун лойиҳаси билан Жиноят кодексининг 168 (фирибгарлик) ва 169-моддалари (ўғрилик) банк пластик карталардан пул маблағларини ўғрилик йўли билан талон-торож қилганлик учун оғирлаштирувчи ҳолат сифатида жавобгарликни белгиловчи янги норма билан тўлдирилмоқда. 

Таъкидланишича, ҳозирги кунда пластик карточкаларидан пул маблағларини ўғрилик йўли билан талон-торож қилиш ҳолатлари Жиноят кодексининг 169-моддаси билан малакаланади.

Қайд этилишича, кўп ҳолларда фуқароларнинг банк пластик карточкаларидан оз миқдорда талон-торож қилганларга Жиноят кодекси 169-моддасининг 1-қисми билан айб эълон қилинади. Бу ўз навбатида, айбдор шахсларга нисбатан етарлича жазо чораларининг қўлланилмаётганига, уларнинг ахлоқан тузалиш йўлига ўтмаётганига, такроран жиноий фаолият билан шуғулланишига олиб келмоқда.