Петербургда чемодандан ўзбекистонлик аёлнинг жасади топилди

Россиянинг Санкт-Петербург шаҳрида чемодан ичидан ўзбекистонлик аёлнинг жасади топилди. Қотилликда аёлнинг 15 ёшли ўғли гумонланмоқда. Бу ҳақда РИА Новости хабар берди.

Қайд этилишича, Ўзбекистонда туғилган аёл Санкт-Петербургда фаррош бўлиб ишлаган. У жорий йилнинг 1 ноябрь куни охирги марта ишга борганидан кейин бедарак йўқолган. Шундан сўнг, унинг яқинлари аёл билан боғлана олмаган.

Ҳуқуқни муҳофаза қилувчи органлар вакилига кўра, аёл телефон қўнғироқларига жавоб бермаган, бироқ SMS орқали ёзишмаларни давом эттирган. У хабарларда қаердалиги ёки ким билан экани ҳақида маълумот бермаган. Аёлнинг опаси унинг йўқолгани юзасидан полицияга ариза билан мурожаат қилган.

Марҳума ижарага олинган хонадонда ўғли билан бирга яшаган. Ўғил эса мактабга онаси номидан ёзилган, касаллиги сабаб дарсларга бормаслиги ҳақидаги хатни олиб борган.

ИИВ маълумотларига кўра, жорий йилнинг 2 ноябрь куни мактаб ўқувчиси ва унинг онаси ўртасида жанжал келиб чиққан ва келишмовчилик давомида ўсмир аёлни бўғиб ўлдирган.

“Baza”нинг қайд этишича, ўсмир илгари ҳам онаси билан доимий равишда жанжаллашиб келган. РЕН ТВнинг аниқлик киритишича, кескин муносабатларга чекиш сабаб бўлган. Қотиллик билан якунланган жанжал ҳам айнан шу масала юзасидан юз берган. Аёл навбатдаги марта ўғлини зарарли одатдан воз кечишга кўндиришга уринган ва унга вейп чекишни тақиқлаган. Бунга жавобан мактаб ўқувчиси унга ҳужум қилган.

“Жанжал пайтида йигит аёлга ташланиб, уни пойабзал иплари ёрдамида бўғиб ўлдирган. Шундан сўнг, у жасадни бутунлигича чамадонга жойлаштириб, экотропага яшириб қўйган”, деб ёзган эди “Life”.

“Baza”, шунингдек, ҳуқуқ-тартибот идоралари ходимлари онасини қидираётган бир пайтда, ўсмир ўзини унинг қаерга ғойиб бўлганини билмасликка олиб юрган.

Эслатиб ўтамиз, аввалроқ Ўзбекистонда вояга етмаган қизга нисбатан жинсий тажовузда гумонланиб, давлатлараро қидирувга берилган Ўзбекистон фуқароси Россиянинг Астрахан вилоятида ушлангани ҳақида хабар берилган эди.