Песков Путин ва Трампнинг эҳтимолий учрашувини тасдиқлади

АҚШ Президенти Дональд Трамп кузда Америка компаниялари раҳбарлари билан Хитойга ташриф буюрса, у Россия Президенти Владимир Путин билан учрашиши мумкин. Буни Кремль матбуот котиби Дмитрий Песков тасдиқлади.

У Россия раҳбарининг 2025 йилнинг сентябрь ойи бошида Хитойга ташрифи режа бўйича кетаётганини ва ҳозирда тайёргарлик кўрилаётганини айтди.

“Аммо биз Президент Трамп ҳам у ерга, Пекинга кетаётганини эшитмадик. Агар шундай бўладиган бўлса, у ерга бориб қолса, албатта, учрашув ўтказиш мақсадга мувофиқлиги масаласи кўтарилишини ҳам инкор этиб бўлмайди”, деди Песков.

Маълумот учун, 3 сентябрь куни Пекинда Иккинчи жаҳон урушидаги ғалабанинг 80 йиллиги ва Хитой халқининг Япония агрессиясига қарши кураш уруши шарафига ҳарбий парад бўлиб ўтади. Парадда Хитой ўз арсеналидаги ўзи ишлаб чиқарган ускуналарини намойиш этади.

Эслатиб ўтамиз, аввалроқ Британиянинг “The Times” газетаси АҚШ Президенти Дональд Трамп сентябрь ойи бошида Хитой раҳбари Си Цзиньпин ва Россия Президенти Владимир Путин билан учрашиш учун Пекинга таклиф қилиниши мумкинлиги ҳақида ёзганди. Нашрнинг ёзишича, АҚШ ва Хитой ўртасидаги қатор савдо битимлари Трампни Пекинга нисбатан душманлик йўлини қайта кўриб чиқишга мажбур қилган, бу эса Америка етакчисининг Иккинчи жаҳон урушидаги ғалабанинг 80 йиллиги шарафига Хитой пойтахтига ҳарбий парадга таклиф қилиниши мумкинлиги ҳақидаги тахминларга сабаб бўлган.