Пентагон ходимларини қисқартирмоқчи

АҚШ Мудофаа вазирлиги “самарадорликни ошириш” ва АҚШ Президенти Дональд Трампнинг устувор йўналишларига “қайта эътибор қаратиш” ҳамда кучлар тайёргарлигини тиклаш учун фуқаролик ишчи кучини 5-8 фоизга қисқартиришни режалаштирмоқда. Бу ҳақда Пентагон баёнот берди.

Ҳозирда вазирлик синов муддатида бўлган ходимларни “қайта баҳолаш”дан ўтказмоқда. Пентагон раҳбари Пит Хегсет кеча, 21 февраль куни бу ҳақда гапирган эди. Баёнотда айтилишича, 5400 га яқин синов муддатидаги ишчилар келаси ҳафтадан бошлаб “дастлабки ҳаракатлар доирасида” ишдан бўшатилиши кутилмоқда. Пентагон ходимларга бўлган эҳтиёжни кўриб чиқаётганда ишга қабул қилишни тўхтатди.

“Хегсет таъкидлаганидек, ҳиссаси муҳим бўлмаган ходимларни сақлаб қолиш шунчаки жамоат манфаатларига мос келмайди. Солиқ тўловчилар кераксиз ходимларни қаерда қисқартиришимиз мумкинлигини билиш учун ишчи кучимизни юқоридан пастгача синчиклаб кўриб чиқишга лойиқдир”, деган Мудофаа вазирининг кадрлар ва тайёргарлик бўйича ўринбосари вазифасини бажарувчи Дарин Селник.

АҚШ Президенти Дональд Трамп Оқ уйга қайтиб келгач, давлат харажатларини оптималлаштириш бўйича кенг кўламли кампания бошлади. Хусусан, шу мақсадда тадбиркор Илон Маск раҳбарлик қиладиган Ҳукумат самарадорлиги департаменти ташкил этилди. Ҳукумат идораларида, жумладан ҳуқуқ-тартибот идораларида оммавий ишдан бўшатиш бошланди.

“The Washington Post” газетасининг бир кун олдин хабар беришича, Хегсет 24 февралгача Пентагон бюджетини кейинги беш йил давомида ҳар йили 8 фоизга қисқартириш режасини ишлаб чиқишни буюрган.

Пентагоннинг юқори мартабали амалдори газетага берган интервьюсида тежалган пуллар “Америка учун темир гумбаз” каби янги маъмурият устуворликларини тўлаш учун “қайта ажратилиши” мумкинлигини айтган. Унинг сўзларига кўра, агар режа амалга оширилса, келаси йил бу соҳа учун бюджетнинг 50 миллиард доллар маблағи тежалиши мумкин.

2025 йилда Пентагоннинг бюджети тахминан 850 миллиард долларни ташкил этади. Ўтган йилнинг 1 октябрь куни бошланган молиявий йил учун у 895 миллиард доллар миқдорида тасдиқланди, бу эса мамлакат учун рекорд ҳисобланади. Бюджетга ўтган йилга нисбатан 9 миллиард доллар кўп киритилган. USA Today газетасининг Бюджет ва сиёсат устуворликлари марказига таяниб хабар беришича, АҚШ Мудофаа вазирлигининг жорий йил учун бюджети 872 миллиард долларни ташкил этади. Бу АҚШ федерал бюджетининг 13 фоизга тўғри келади ва дунёдаги барча мамлакатларнинг мудофаа харажатлари энг юқори кўрсаткичидир.

Эслатиб ўтамиз, аввалроқ АҚШ Президенти Дональд Трамп янги ташкил этилган Ҳукумат самарадорлиги департаменти (DOGE) раҳбари Илон Маскка таълим ва ҳарбий соҳага сарфланган маблағларни қайта кўриб чиқишни топширганди.