Пенсильваниядаги отишма: 45 ёшли эркак ўз қариндошларини ўлдиргани маълум бўлди

Аввалроқ, Американинг Пенсильвания штатида содир бўлган отишмада 9 киши ҳалок бўлгани ҳақида хабар берилган эди. Отишмани 45 ёшли эркак содир этгани, у ўз уйида 8 кишини, жумладан, ҳомиладор аёл ва болаларни отиб ўлдиргач, ўз жонига қасд қилгани маълум бўлди. Бу ҳақда “Associated Press” хабар берди.

Эри шаҳри полицияси бошлиғи Рик Лорахнинг маълум қилишича, эркак жорий йилнинг 9 октябрь куни ўз уйида 8 кишини отган. Ҳалок бўлганларнинг 7 нафари унинг қариндошлари бўлган. Саккизинчи қурбон эса ҳомиладор аёлнинг дўсти экани айтилмоқда.

Терговчилар қўлга киритган видео ва аудио ёзувларда уй ичидан бўғиқ ўқ овозлари эшитилгани қайд этилган. 9 октябрь куни соат 17:00 га яқин икки аёл уйга келиб, эшикни тақиллата бошлаган. Полиция бошлиғининг сўзларига кўра, аёллар қаттиқ хавотирланган ҳолатда бўлган. Шундан сўнг қуролланган эркак ташқарига чиқиб, ўзига қараб югурган икки аёлни отган ва яна уйга кириб кетган.

Полиция ходимлари воқеа жойига етиб келганида, икки аёлнинг жасадини уй ташқарисида топган. Махсус дрон ва робот ёрдамида дастлабки текширув ўтказилгач, ходимлар уйга кирган. Биринчи қаватда 5 ёшли бола ва 1 ёшли қизалоқнинг жасади аниқланган. Зинапоя қисмида яна 2 аёл ва 2 нафар ёш эркакнинг жасади топилган. Отишмани содир этган эркакнинг жасади эса иккинчи қаватдан аниқланган.

“Қурбонлар ва уларнинг оилаларига ҳурмат юзасидан ходимларимиз уй ичида нималарга дуч келганини батафсил айтмайман. Аммо жамоатчилик бу фожианинг кўлами ва унинг қурбонлар, уларнинг яқинлари ҳамда бутун шаҳримизга кўрсатган оғир таъсирини тушунишини истайман”, деган полиция бошлиғи матбуот анжуманида.

Лорах жиноятнинг сабабини очиқламаган. Терговчилар бошқа қариндошлар билан суҳбатлашиш, шунингдек, ҳалок бўлган 2 аёлнинг мобил телефонларини текширишни режалаштирмоқда.

“Улар ўша уйда нимадир содир бўлаётганини билишган. Биз бунинг нима эканини аниқлашимиз керак”, деган полиция бошлиғи.

Унинг қайд этишича, полиция ўқ овозларини аниқлашга мўлжалланган ShotSpotter тизими орқали хабар келганидан бир неча дақиқа ўтиб воқеа жойига етиб борган. Мазкур тизим микрофонлар тармоғи ва сунъий интеллект ёрдамида ўқ овозларини аниқлайди.

Полиция махсус бўлинмаси воқеа жойида шовқинли гранаталардан фойдаланган. Шу сабабли айрим товушлар ўқ овози сифатида нотўғри талқин қилинган бўлиши мумкин. Полиция маълумотига кўра, дастлабки ҳодисадан кейин бошқа ўқ узилмаган.

Пенсильвания губернатори Жош Шапиро Эри шаҳри мэри Дарья Девлинга ёрдам кўрсатишга тайёрлигини билдирган. Мэр қурбонларнинг оилаларига ҳамдардлик билдириб, бутун шаҳар улар билан бирга қайғураётганини айтган. Округ прокурори Элизабет Хирз эса тергов давом этаётган бир пайтда аҳолини миш-мишлар ва тасдиқланмаган маълумотларни тарқатмасликка чақирган.

“Бу оилалар бошдан кечираётган азоб-уқубатларни миш-мишлар, тахминлар ёки тасдиқланмаган маълумотлар билан янада кучайтирманг”, деган у.

Эслатиб ўтамиз, аввалроқ АҚШнинг Нью-Йорк шаҳрида Иммиграция ва божхона назорати хизмати (ICE) агентлари махсус амалиёт вақтида машина ичида 5 ёшли бола бўлган эркакни отиб, яралагани ҳақида хабар берилган эди.