Пашинян Алиевга раҳмат айтди

Арманистон Бош вазири Никол Пашинян Озарбайжон Президенти Илҳом Алиевга юк транзити бўйича чекловларни бекор қилгани учун миннатдорлик билдирди. Бу ҳақда у бугун, 22 октябрь куни Тбилисида ўтаётган V “Ипак йўли” форумида сўз очди.

“Кеча Илҳом Алиев Озарбайжон Арманистонга йўналган юк транзитига қўйилган чекловларни бекор қилганини эълон қилди. Бу ниҳоятда муҳим баёнот ва мен бу қадам учун Озарбайжон Президентига миннатдорлик билдирмоқчиман. Шунингдек, ушбу келишувга эришишда тутган ўрни учун Қозоғистон Президентига ва Грузия Бош вазирига ҳам миннатдорлик билдираман”, дейди Арманистон Бош вазири.

Эслатиб ўтамиз, кеча, 21 октябрь куни Озарбайжон Президенти Илҳом Алиев Қозоғистонга давлат ташрифи чоғида Арманистонга юк транзитига оид барча чекловлар бекор қилинганини маълум қилган эди.

Қайд этиш жоиз, жорий йилнинг август ойида Арманистон ва Озарбайжон етакчилари АҚШ Президенти Доналд Трамп иштирокида Вашингтонда икки давлат ўртасида тинчлик муносабатлари тўғрисидаги декларацияни имзолаганди.