Парагвай собиқ президенти уй қамоғига олинди

Парагвай собиқ президенти Сантьяго Пенья банк инқирози билан боғлиқ можаро ортдан лавозимидан четлатилиб, уй қамоғига олинди. Унинг ўрнини собиқ вице-президент Педро Альяна эгаллаб, жорий йилнинг 6 ноябрь куни мамлакатнинг 53-президенти сифатида қасамёд қилди. Бу ҳақда “Al Jazeera” хабар берди.

Маълум қилинишича, кеча, 7 ноябрь куни парламентнинг юқори палатаси – Сенатдаги 45 нафар аъзодан 44 нафари Пеньяни лавозимидан четлатиш учун овоз берган. Бир сенатор бетараф қолган. Бундан олдин Вакиллар палатаси ҳам 78 овоз билан унга нисбатан импичмент жараёнини маъқуллаган.

Сиёсий инқирозга мамлакатдаги йирик молиявий ташкилотлардан бири – Ueno Bank фаолиятининг тўхтатилиши сабаб бўлган. Парагвай Марказий банки жорий йилнинг 3 ноябрь куни молиявий ташкилотнинг тўловга қобилиятлилик бўйича қонуний талабларни бажармаётганини маълум қилган.

Шундан сўнг банк давлат назоратига олиниб, унинг қолган активлари бошқа банкларга ўтказилган. Банк инқирози оқибатида миллионлаб мижозлар ўз ҳисобварақлари ва пенсия тўловларидан фойдалана олмай қолган. Маълумотларга кўра, Ueno мамлакатдаги қарийб 3 миллион кишига хизмат кўрсатган ва Парагвайдаги катта ёшли аҳолининг учдан икки қисми унинг мижозлари бўлган.

Можаро ортдан Пеньянинг банк билан алоқалари ҳам жиддий саволларни келтириб чиқарган. У 2023 йилда Ueno’нинг бош компанияси акциядори бўлгани аниқланган, бироқ 2025 йилнинг бошида ўз улушини сотганини билдирган. Прокуратура собиқ президент банкка давлат идоралари орқали имтиёзлар яратган бўлиши мумкинлигини текширмоқда.

Пеня аввалроқ истеъфога чиқиш истагини билдирган. Бироқ 6 ноябрь куни парламент унинг истеъфосини қабул қилмасдан, импичмент жараёнини давом эттирган. Собиқ президент ўзига қўйилаётган айбловларни рад этиб, тергов билан ҳамкорлик қилишини билдирган.

Шунингдек, Парагвай Марказий банкининг собиқ раҳбари Карлос Карвалло ҳам можаро доирасида терговга жалб қилинган. Унга нисбатан ҳам ҳибсга олиш чораси қўллаш ҳақида қарор чиқарилган.

Ҳозирда Ueno Bank можароси бўйича камида 27 киши жиноий жавобгарликка тортилмоқда. Улар орасида банкнинг асосий акциядори Мигел Васкес ҳам бор. Тергов доирасида фирибгарликка уриниш, ишончни суиистеъмол қилиш, маблағларни ўзлаштириш ва мансабдор шахсларга таъсир ўтказиш каби ҳолатлар ўрганилмоқда.

Янги президент Педро Альяна эса мамлакатни 2028 йилнинг августигача бошқариши кутилмоқда. У 2023 йилдан буён Пенянинг вице-президенти бўлиб ишлаган.

Эслатиб ўтамиз, аввалроқ Парагвай президенти Сантьяго Пенья мамлакатдаги йирик рақамли банклардан бири – Ueno фаолиятининг инқирозга юз тутиши ортидан истеъфога чиққани ҳақида хабар берилган эди.