Озар-арман чегарасида яна отишма: Баку ва Ереван бир-бирини айблаяпти
Олам
−
20 Октябрь 2022 2809
Арманистон Қуролли Кучлари қўшни Озарбайжоннинг Дашкесан ва Калбажар туманларини ўққа тутди. Бу ҳақда Озарбайжон Мудофаа вазирлиги хабар берди.
Вазирликнинг таъкидлашича, бугун, 20 октябрга ўтар кечаси Арманистон Қуролли Кучлари бўлинмалари Дашкесан туманининг Астаф, ҳамда Калбажар туманининг Моллабайрамли аҳоли пунктлари йўналишида қуроллардан ўт очган.
Ўз навбатида, бунга қарши, Озарбайжон армиясининг бўлинмалари ҳам тегишли жавоб чораларини кўрган.
Арманистон Мудофаа вазирлиги баёнотига кўра, Озарбайжон Қуролли Кучлари бўлинмалари мамлакатнинг шарқий чегарасида жойлашган Арманистон ҳарбий бўлинмаларига турли калибрли қуроллар, шунингдек, миномётлардан ўқ узган.
“Қуролли Кучлар бўлинмалари душманнинг ўқ отиш нуқталарини бостирган, арманлар томонидан йўқотишлар йўқ. Айни пайтда вазият нисбатан барқарор”, дея дея қўшимча қилинади хабарда.
Эслатиб ўтамиз, Озарбайжон ва Арманистон чегарасида охирги йирик кескинлик 13 сентябрь куни соат 00:05 дан бошлаб Озарбайжон Қуролли Кучлари бўлинмалари Горис, Сотк ва Жермук яқинидаги арман позициялари йўналиши бўйича артиллерия, йирик калибрли ўқ отиш қуролларидан интенсив ўққа тутиши оқибатида содир бўлган эди.
Темур Жумаев
Live
Барчаси