Орбан ЕИдан Россия билан бевосита музокара бошлашни талаб қилди – ОАВ

Венгрия Бош вазири Виктор Орбан Европа Иттифоқини Украинада ўт очишни тўхтатиш бўйича Россия билан бевосита музокаралар олиб боришга чақирди. Шунингдек, у Украина масаласида Евроиттифоққа аъзо 27 давлат ўртасида ягона фикрга келиш ҳаракатларига қарши эканини билдирди. Бу ҳақда Орбан томонидан Европа Кенгаши раиси Антониу Коштага юборилган хатга таяниб, “Financial Times” хабар берди. 

“Украинага нисбатан ёндашувимизда стратегик келишмовчиликлар мавжудлиги аниқ бўлди. Буларни қонун лойиҳалари ёки дипломатик мулоқот йўли билан бартараф этишнинг иложи йўқ”, деб ёзган Венгрия Бош вазири ўз мактубида.

Нашрнинг хабар беришича, кеча, 28 февраль куни Брюсселда Евроиттифоқ давлатлари элчилари иштирокида ўтказилган музокараларда Венгриянинг ЕИдаги элчиси ҳам худди шу позицияни билдирган.

Орбан ўз мактубида ўтган ҳафта БМТ Хавфсизлик Кенгаши томонидан АҚШ ва Россиянинг қўллаб-қувватлаши билан қабул қилинган янги резолюцияга таянади. Ўшанда Европа пойтахтлари овоз беришда бетараф қолганди. Ушбу ҳужжатда Россиянинг Украинага бостириб кириши бевосита тилга олинмаган, бироқ у зудлик билан можарони тугатишга чақиради.

“БМТ резолюцияси можаролар тарихида янги босқични бошлаб берди ва Европа Кенгаши илгари келишиб олган барча ифодаларни эскирган ҳолга келтирди”, дея таъкидлаган Виктор Орбан ўз хатида.

Орбаннинг хати 6 март куни Брюсселда бўлиб ўтадиган ЕИ етакчилари саммити арафасида юборилган. Мазкур йиғилишда Украинага қўшимча ҳарбий ёрдам кўрсатиш ва Европа давлатларининг мудофаа харажатларини ошириш масалалари муҳокама қилинади. Бу масала АҚШ Президенти Дональд Трамп Европа иттифоқчилари ўз хавфсизлиги учун кўпроқ масъулиятни зиммасига олиши, Америка ҳарбий қудратига ортиқча таянмаслиги кераклигини билдирганидан кейин айниқса долзарб тус олди.

Бундан ташқари, 2 март куни Лондонда яна бир учрашув бўлиб ўтади. Унда ўндан ортиқ Европа давлатлари етакчилари Украинадаги урушни якунлаш ва Европа хавфсизлиги масалаларини муҳокама қилиш учун йиғилади. Украина Президенти Владимир Зеленский иккала саммитга ҳам таклиф этилган.

Эслатиб ўтамиз, аввалроқ Виктор Орбан миллий парламентнинг баҳорги сессияси очилишида Украина Шимолий Атлантика Шартномаси Ташкилоти (НАТО) аъзоси бўлмаслигини, у альянс ва Россия ўртасидаги буфер зона бўлиб қолишини ва бу АҚШда республикачи Дональд Трамп ҳокимиятга қайтганидан кейин маълум бўлганини айтган эди. унингдек, у тинчлик шартномаси Венгрия ва НАТОга аъзо давлатлар хавфсизлигини кафолатлаши ва яна буфер ҳудудга айланадиган Украина мақоми ҳам шунга яраша ҳал этилиши кераклигини таъкидлаган.