Орбан Венгрия парламентини тарк этди

Венгрия Бош вазири Виктор Орбан Венгрия парламентидаги депутатлик мандатидан воз кечишини маълум қилди. У бу қарорини 25 апрель куни ижтимоий тармоқларда эълон қилган.

Маълум бўлишича, Венгрия Бош вазири лавозимидан кетаётган Орбан парламент сайловларида унинг партияси Венгрия фуқаролик иттифоқи мағлуб бўлгач, янги чақириқ парламент ишида қатнашмасликка қарор қилган. Унга кўра, депутатлик мандати аслида партияга тегишли бўлгани сабабли ундан воз кечган ва энди асосий эътиборини сиёсий ҳаракатни қайта ташкил этишга қаратмоқчи.

Орбан шунингдек, парламентдаги “Фидес” – Христиан-демократлар фракциясига янги раҳбар тайинланишини айтган. Шу билан бирга, Орбан партия раиси сифатида қолиш ниятида эканини билдириб, бу масала июнь ойидаги партия қурултойида кўриб чиқилишини айтган.

Парламент сайловларида ғалаба қозонган “Тиса” партияси етакчиси Петер Мадьяр 9 май куни Бош вазир лавозимини эгаллаши кутилмоқда. У Орбан даврида қабул қилинган айрим ташқи сиёсий қарорларни қайта кўриб чиқишини билдирган.

Хусусан, Мадяр Венгриянинг Халқаро жиноий суддан чиқиш жараёнини тўхтатишини айтган. Бу жараён илгари Биньямин Нетаньяхунинг Венгрияга ташрифи билан боғлиқ қарорлар фонида бошланган эди. Шунингдек, у Европа Иттифоқининг Украинага кредит ажратиши ва Россияга қарши санкциялар бўйича позицияни ҳам ўзгартириш ниятида.

Орбан эса ўзининг Россия Президенти Владимир Путин билан яқин муносабатлари билан танилган. Сайловлардан сўнг Кремль вакили Дмитрий Песков янги ҳукумат билан ҳам прагматик алоқалар давом этишига умид билдирган.