Омбордан 1,7 млрд сўмлик кўмирни ўмарган менежер ушланди

Фарғона вилоятининг Бағдод туманида тадбиркорга 1,7 миллиард сўмлик зарар етказган менежер қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум қилинишича, Департаментнинг Бағдод тумани бўлими томонидан тадбиркорлик субъектларининг ҳуқуқларини ҳимоя қилиш юзасидан ўтказилган терговга қадар текширувда “J.K.” МЧЖга қарашли кўмир омбори менежери Х.М. ўзига ишониб топширилган ва моддий жавобгарлигида бўлган хорижий давлатларда ишлаб чиқарилган 1 658,53 тонна кўмирни ўзлаштириш йўли билан талон-торож қилиб, “J.K.” МЧЖ манфаатларига 1,7 миллиард сўмлик зарар етказганлиги аниқланган.

Билдирилишича, мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ Фарғона шаҳрида тадбиркорлик субъекти раҳбари банкдан ажратилган 1,5 млрд сўмлик кредит маблағларини ўзлаштирганликда гумон қилинган шахс ушланган эди.