Олтинкўл ҳокими ўзгарди

Бугун, 6 февраль куни Эргашали Абдуқурбонович Абдужалилов Андижон вилоятидаги Олтинкўл тумани ҳокими вазифасини бажарувчи этиб тайинланди. Бу ҳақда вилоят ҳокимлиги матбуот хизмати хабар берди.

Эргашали Абдужалилов ушбу лавозимга тайинлангунига қадар Андижон вилояти ҳокимининг маҳаллий саноатни ривожлантириш масалалари бўйича ёрдамчиси сифатида фаолият юритиб келаётган эди.

У Олтинкўл туманига 2022 йилнинг майидан буён раҳбарлик қилиб келаётган Муҳаммадмусо Обидов ўрнини эгаллади.

Қайд этиш жоизки, олдинроқ ижтимоий тармоқларда Олтинкўл тумани ҳокими ўзгаргани ҳақида хабарлар тарқалган ва вилоят ҳокимлиги матбуот хизмати буни рад этганди. 

Маълумот учун, янги тайинланган Абдужалилов 1985 йилда Марҳамат туманида туғилган. У 2007 йилда Ўзбекистон Республикаси ИИВ академиясини тамомлаган. Меҳнат фаолияти давомида ижтимоий, иқтисодий, ҳуқуқий тизимларда мутахассис, бўлим бошлиғи, раҳбар ўринбосари ҳамда раҳбарлик лавозимларида ишлаган. 

Эслатиб ўтамиз, кеча, 5 февраль куни Тошкент вилоятининг Чиноз туманига Шерзод Солиҳов ҳоким этиб тайинланганди.