Олимпиадада энг кекса чемпион аниқланди

Америкалик бобслейчи Элана Майерс-Тейлор Италияда ўтаётган 2026 йилги қишки Олимпия ўйинларида тарихий ғалабага эришди. У ушбу мусобақа тарихида олтин медаль қўлга киритган энг кекса спортчига айланди.

Кеча, 16 февраль куни Элана бобслей бўйича ўтказилган мусобақалар яккалик йўналишида олтин медални қўлга киритди. У ҳал қилувчи тўртинчи чиқишдан аввал иккинчи ўринда бораётганди, бироқ якунда пешқадамликни эгаллашга муваффақ бўлди. Бу орқали Майерс-Тейлор фаолиятида илк бор Олимпия чемпионига айланди. 

Шу тариқа, америкалик спортчи қишки Олимпия ўйинлари тарихидаги энг ёши катта индивидуал мусобақа чемпиони сифатида ҳам рекорд ўрнатди. Чемпионликни нишонлаган пайтда у 41 ёш, 4 ой ва 6 кунлик эди.

Ушбу натижа билан Майерс-Тейлор Бенджамин Карлнинг жорий йилнинг 8 февраль куни ўрнатган рекордини янгилади. Австриялик сноубордчи олтин медални 40 ёш, 3 ой ва 23 кунлигида қўлга киритганди.

Шунингдек, бобслей яккалик баҳсларида кумуш медаль германиялик Лаура Нольтега (+0,04 сония), бронза медаль эса яна бир америкалик Хамфрис Кейлига (+0,12 сония) насиб этди.

Маълумот учун, шу пайтгача Элана Майерс-Тейлор 2010, 2014, 2018 йилги қишки Олимпия ўйинларида учта кумуш, 2014 ва 2018 йилги Олимпия ўйинларида иккита бронза медални ҳам қўлга киритган.