Dunyodagi eng keksa marafon yuguruvchisi YTHda vafot etdi (video)

Joriy yilning 14 iyul kuni tarixdagi eng keksa marafon yuguruvchisi deb hisoblangan hindistonlik sportchi Fauja Singx 114 yoshida mashina urib ketishi oqibatida vafot etdi. Bu haqda CNN xabar berdi.

Hindiston politsiyasi ma’lumotlariga ko‘ra, dunyodagi eng keksa marafon yuguruvchisi bundan o‘n yil oldin – 100 yoshdan oshganidan keyin ham musobaqalarda qatnashgan.

1911 yilda Hindistonning Panjob viloyatidagi qishloqlardan birida tug‘ilgan. 

U dunyodagi eng keksa marafon yuguruvchisi hisoblangan, ammo u tug‘ilganlik to‘g‘risidagi guvohnomasi yo‘qligi sababli Ginnesning rekordlar kitobiga kiritilmagan.

Hindiston politsiyasiga ko‘ra, Singx qishlog‘i yaqinidagi yo‘lda ketayotganida uni noma’lum avtomobil urib ketgan.

U YTHdan so‘ng darhol Jalandhar tumanidagi Shrimann shifoxonasiga jo‘natilgan, u yerda boshi va qovurg‘alaridan olgan jarohatlari tufayli vafot etgan.

15 iyul kuni politsiya videokuzatuv kameralari tasvirlarini o‘rganib chiqqandan so‘ng gumonlanuvchini hibsga olgan. Singx marafonlarni faqat 89 yoshida, xotini va o‘g‘lining vafotidan keyin Angliyaga ko‘chib o‘tganida boshlagan. U o‘zining birinchi marafonini bir necha oylik mashg‘ulotdan so‘ng o‘tkazgan va uch yildan so‘ng – 2003 yilda Toronto suv qirg‘og‘ida bo‘lib o‘tgan marafonda 5 soat 40 daqiqalik shaxsiy rekordini o‘rnatgan. 2011 yilda Singx Torontoga qaytib borgan va u yerda 8 soat 11 daqiqa va 6 soniyada marafon marrasiga yetib borgan birinchi yuz yillik odamga aylangan.

Uning marafondagi so‘nggi ishtiroki 2013 yilda Gonkongda 10 kilometrlik masofada bo‘lgan. U hatto 2012 yilgi London Olimpiadasi mash’alasini ham ko‘tarib chiqqan.

Eslatib o‘tamiz, avvalroq yaponiyalik 108 yoshli Shitsui Xakoishi dunyodagi eng qari sartarosh sifatida Ginnesning rekordlar kitobiga kiritilgandi.