Олимпиада совриндори 3 йилга қамалди

Бугун, 15 декабрь куни Қозоғистоннинг Павлодар шаҳрида суд машҳур қозоғистонлик эркин курашчи, Олимпия ўйинларининг бронза медали совриндори Даулет Шабанбайга ҳукм чиқарди. Бу ҳақда “Tengrinew.kz” хабар берди.

Нашрнинг ёзишича, суд спортчини ҳокимият вакилларига нисбатан зўравонлик қўллашда айбдор деб топган. Унга ўртача хавфсизликдаги колонияда ўташ шарти билан уч йил озодликдан маҳрум қилиш жазоси тайинланган.

Тергов маълумотларига кўра, жорий йилнинг сентябрь ойида Миллий гвардиянинг уч нафар ҳарбий хизматчисидан иборат патрул кечки пайт спортчини кафе яқинида тўхтатган. Бунга эркак кишининг маст ҳолатда бўлиб, шовқин кўтаргани ва тажовузкорона ҳаракат қилгани ҳақидаги шикоят сабаб бўлган.

Суҳбат чоғида Шабанбай патрул ходимларини ҳақорат қила бошлаган, сўнгра куч ишлатган. У улардан бирини итариб юборган, патрул бошлиғини тепган ва яна икки нафар ходимни урган. Шундан сўнг у қўлга олинган.

Маълумот учун, эркин кураш бўйича халқаро тоифадаги спорт устаси Даулет Шабанбай спортчилик фаолиятини беш йил аввал якунлаган. Унинг энг йирик ютуқларидан бири – 2012 йил Лондон Олимпия ўйинларининг бронза медали бўлиб, унга ушбу мукофот 2022 йилда насиб этган. Бунга мусобақада соврин олган икки нафар спортчининг допинг сабаб дисквалификация қилиниши сабаб бўлган.

Эслатиб ўтамиз, аввалроқ Аргентина полицияси мамлакатда 550 миллион долларлик фирибгарлик ва коррупция бўйича давом этаётган тергов доирасида миллий футбол федерацияси ва 35 та клуб офисларида рейд ўтказганди.