Оқ уй Конгрессга Эрон билан уруш тугаганини билдирди

Кеча, 1 май куни Оқ уйнинг Конгрессга йўллаган мактубида АҚШ ва Эрон ўртасидаги ҳарбий ҳаракатлар “тугаганини” маълум қилди, гарчи минтақада АҚШ қуролли кучлари ҳали ҳам мавжуд бўлса-да. Бу ҳақда “Associated Press” хабар берди.  

АҚШ Президенти Дональд Трампнинг бу баёноти Конгресс аъзолари томонидан Эрон билан урушни давом эттириш учун рухсат олиш бўйича 1 май санасидаги ҳуқуқий муддатни амалда четлаб ўтади.

Бу муддат республикачи қонунчилар ҳеч қандай чора кўрмасдан ўтиб кетиши кутилаётган эди, чунки улар қарорни Президентга қолдирган.

Мактуб Трампнинг уруш бўйича Президент ваколатларини кенг талқин қилаётгани ва бу қарор қонуний жиҳатдан баҳсли эканини яна бир бор кўрсатди. У бу урушни икки ой олдин Конгресс рухсатисиз бошлаган эди.

Трамп “2026 йил 28 февралда бошланган ҳарбий ҳаракатлар якунланди”, деб ёзган Вакиллар палатаси спикери Майк Жонсон ва Сенат президенти Чак Грасслига йўллаган мактубида.

Доналд Трамп қонунчиларга йўллаган мактубида Теҳрон билан ўт очишни тўхтатиш келишуви ушбу муддатни амалда тўхтатишини таъкидлаган. У жорий йилнинг 7 апрелидан бери АҚШ ва Эрон ўртасида ҳеч қандай отишма бўлмаганини ёзиб, сулҳ муддатсиз равишда узайтирилганини қайд этган.

Шунга қарамай, у уруш бутунлай тугамаган бўлиши мумкинлигини ҳам таъкидлаган:

“Эрон режимига қарши АҚШ операцияларидаги муваффақият ва барқарор тинчлик ўрнатиш бўйича ҳаракатларга қарамай, Эроннинг АҚШ ва ҳарбий кучларимизга таҳдиди ҳануз жиддий сақланиб қолмоқда,” деган Трамп.

1973 йилги “ҳарбий ваколатлар тўғрисидаги резолюция”га кўра, АҚШ Президенти ҳарбий ҳаракатларни фақат 60 кун давомида олиб бориши мумкин. Шундан сўнг у ҳаракатларни тўхтатиши ёки “яқинлашиб келаётган ҳарбий зарурат” ҳолатида Конгрессдан 30 кунлик узайтириш сўраши керак бўлади.

Эслатиб ўтамиз, аввалроқ АҚШ президенти Дональд Трамп Эроннинг Покистон орқали юборилган урушни тугатиш бўйича сўнгги тинчлик таклифидан қониқмаганини билдирганди.