ОИТС рўйхатида бўла туриб, жинсий хизмат кўрсатган аёллар ушланди (видео)

Жорий йил 15 июлдан 15 августга қадар давом этаётган “Хавфсиз ва соғлом юрт” тезкор профилактик тадбирларининг 2-босқичида Тошкент вилоятида ОИТС касали бўла туриб, жинсий хизмат кўрсатган аёллар қўлга олинди. Бу ҳақда вилоят Ички ишлар бош бошқармаси хабар берди.

Хусусан, 1993 йилда туғилган аёл 4 нафар қизни пойтахтдан Бўстонлиқ туманига олиб бориб, уларни пул эвазига суткалик жинсий алоқа ва интим хизмат кўрсатишга жалб қилгани аниқланган. Аёл ушбу хизматлар эвазига олдиндан келишилган 800 долларни назорат остидаги шахсдан олаётган вақтида ашёвий далиллар билан ушланган. Шу каби яна бир ҳолатда, 3 қизни Бўстонлиқ туманидаги дала-ҳовлида шу турдаги хизматларни кўрсатишга олиб борган аёл бунинг эвазига олдиндан келишилган 1200 долларнинг 600 долларини олаётган вақтида қўлга олинган.

Тезкор профилактик тадбирларнинг 15 куни давомида 5 та ҳолатда қўшмачилик, 12 та фоҳишахона сақлаш, 4 та ОИТСни тарқатиш билан боғлиқ жиноят аниқланиб, тегишли тартибда чора кўрилди.

Мазкур ҳолатлар юзасидан ушланган шахсларга нисбатан Жиноят кодексининг 131-моддаси (қўшмачилик қилиш ёки фоҳишахона сақлаш) ва 113-моддаси (таносил ёки ОИВ касаллиги/ОИТСни тарқатиш) билан жиноят иши қўзғатилиб, тергов ҳаракатлари олиб борилмоқда.

Маълумот учун, Ўзбекистонда одам иммунитет танқислиги вирусини юқтириб олганлар сони ортиб бормоқда. 2024 йилда 5,1 миллиондан ортиқ фуқаро ОИВ/ОИТСга текширилган ва уларнинг 3903 нафарида ушбу касаллик аниқланган. Узоқ муддат чет элда бўлиб қайтган 1,7 млн фуқаронинг фақат 434 минги ёки 25 фоизи ихтиёрий равишда ОИВ/ОИТСга текширилган ва 1512 нафарида ушбу вирус аниқланган. Бу рақам эса 2023 йилга нисбатан 19 фоизга ўсган.

Шунингдек, ўтган йилда 12,7 мингдан ортиқ чет эл фуқаролари ва фуқаролиги бўлмаган шахслар ихтиёрий равишда ОИВ/ОИТСга текширилган ҳамда уларнинг 81 нафари шу касалликка чалингани аниқланган. Меҳнат мигрантлари орасида аниқланаётган ҳолатлар ўтган йилга нисбатан 23,7 фоизга ошган. Кўплаб мамлакатларда, айниқса, постсовет ҳудудида ОИВ ва ОИТС инфекциясини юқтириб олиш билан боғлиқ ҳолатлар нафақат шахсий даражада, балки мамлакатнинг расмий статистик маълумотларида ҳам яширилади, камайтириб кўрсатилади. Ўзбекистондаги статистика эса қандай таҳлилларга кўра юритилиши ҳамон мавҳум.

Эслатиб ўтамиз, аввалроқ ОИТСга қарши курашиш марказида рўйхатда туриб, бошқа шахслар билан тартибсиз жинсий алоқа қилган 20 ёшли қиз ушланганди. У жиноий жавобгарликка тортилиши ҳақида огоҳлантирилишига қарамасдан 5 киши билан жинсий алоқа қилган.