Норвегия қироли ортидан малика Астрид ҳам вафот этди

Бугун, 11 сентябрь куни Норвегия маликаси Астрид 94 ёшида вафот этди. У укаси, қирол Харальд V’нинг дафн маросимидан атиги икки кун ўтиб ҳаётдан кўз юмди. Бу ҳақда Норвегия қироллик саройи маълум қилди. https://www.reuters.com/world/norways-princess-astrid-dies-aged-94-two-days-after-kings-funeral-2026-09-11/

“Қирол малика Астриднинг вафот этгани ҳақидаги хабарни чуқур қайғу билан қабул қилди. Малика 11 сентябрь куни 94 ёшида вафот этди”, дейилади сарой баёнотида.

Шунингдек, Қирол Хакон VIII малика Астриднинг қироллик оиласидаги хизматларини алоҳида эътироф этган.

“Малика Астрид ўзининг узоқ умри давомида қироллик саройини илиқ ва итоаткорона тарзда ифодалаган”, деган қирол Хакон VIII баёнотида.

Қайд этилишича, малика Астрид жорий йилнинг 9 сентябрь куни Ослодаги соборда бўлиб ўтган укаси қирол Харальд V’нинг дафн маросимида иштирок этган.

Қиролнинг дафн маросимига Европа ва бошқа мамлакатлардан қироллик оилалари вакиллари ташриф буюрган. Норвегия қироллик оиласи билан бирга Швеция, Дания, Нидерландия, Бельгия, Испания, Иордания, Монако, Люксембург, Лихтенштейн, Япония ва Греция қироллик оилалари вакиллари ҳам марҳум қиролга ҳурмат бажо келтирган.

Маълумот учун, Астрид 1932 йилда туғилган. У Норвегия қироли Олав V ва қиролича Мартанинг иккинчи фарзанди бўлган. Астриднинг укаси Харальд V 1991 йилда Норвегия тахтига ўтирган ва 2026 йил август ойида вафот этган.

Эслатиб ўтамиз, жорий йилнинг 28 август куни Европанинг амалдаги энг кекса монархи – Норвегия қироли Харальд V 89 ёшида вафот этган эди.