“Ноқулайликлар бор”. Путин Россиядаги ёқилғи танқислигини тан олди

Россия Президенти Владимир Путин Россияда давом этаётган ёқилғи танқислиги аҳолига “муайян ноқулайликлар” туғдираётганини, аммо, “масалалар ҳал қилинаётганини” билдирди. Унинг сўзларидан парчани “Москва. Кремль. Путин” кўрсатуви бошловчиси Павел Зарубин ўзининг Telegram-каналида эълон қилди.

“Ҳа, албатта, одамлар учун муайян ноқулайликлар бор, лекин ҳукумат, албатта, буни назорат остида ушлаб туриши керак. Ҳамма масалалар ҳам ҳал этилгани йўқ, аммо улар ҳал қилинмоқда”, дейди Путин. 

Шунингдек, у “ҳукумат раиси ушбу масалаларни назоратда ушлаб турганини”, шунингдек “махсус комиссия тузилганини” қўшимча қилган.

Эслатиб ўтамиз, Россиядаги ёқилғи қуйиш шохобчаларида етказиб беришдаги муаммолар жорий йил май ойи охирида Украина Қуролли кучларининг НҚЗга (нефтни қайта ишлаш заводларига) ҳужумлари сабабли бошланган эди. Бу АЁҚШларда нархларнинг ошишига ва ёқилғи танқислигига олиб келди. Июнь ойида Бош вазир ўринбосари Александр Новак тегишли идораларга ички ёқилғи бозорини барқарорлаштириш чора-тадбирларини ишлаб чиқишни топширди. Ўшанда авиация керосинини экспорт қилишга тақиқ жорий этилган эди. Июль ойи бошида эса ёқилғи таъминоти ишончлилигини ошириш учун Россия НҚЗларига йил охиригача Евро-3 стандартларига жавоб берадиган бензин сотишга рухсат берилди. Бир неча кун ўтиб дизель экспортига ҳам тақиқ қўйилди.

Юқорида санаб ўтилган чора-тадбирлар билан бир қаторда Путин Россия бозорини ёқилғи билан таъминлаш тўғрисидаги қонунни имзолади. У, жумладан, тўғридан тўғри ҳайдалган бензинни бошқа компонентлар билан аралаштиришга рухсат беради. Шунингдек, Россия ёқилғи импортини бошлади. Новак ҳукумат чора-тадбирлари натижа бераётганини таъкидлаган: бир қатор ҳудудларда чекловлар олиб ташланмоқда, ишлаётган АЁҚШлар сони ортиб, навбатлар камаймоқда. Президент ҳам ёқилғи билан боғлиқ муаммолар вақтинчалик эканини урғулаган.