Нетаньяху Исроилнинг пейжер портлашларига алоқадорлигини тан олди

Исроил Бош вазири Биньямин Нетаньяху ўз мамлакатининг Ливандаги сигнализация операциясига алоқадорлигини тан олиб, Ливандаги “Ҳизбуллоҳ” ҳаракатининг сентябрь ойида мамлакат бўйлаб юзлаб алоқа мосламалари портлаган ҳужумини маъқуллаганини тасдиқлади. Бу ҳақда кеча, 10 ноябрь куни кечқурун Исроил Бош вазири матбуот котиби Омер Достри маълум қилди.

Исроилнинг юқори мартабали ҳарбий амалдорлари операцияга қарши эди

“Пейжер операцияси ва Насруллоҳга суиқасд юқори мартабали мудофаа амалдорлари ва сиёсий қарор қабул қилувчиларнинг қаршиликларига қарамай амалга оширилди”, деди Нетаньяху Вазирлар Маҳкамаси йиғилишида сўзлаган нутқида. 

“The Times of Israel” нашрига кўра, гап яқинда ишдан бўшатилган мудофаа вазири Йоав Галант ҳақида кетмоқда.

17 ва 18 сентябрь кунлари Ливанда “Ҳизбуллоҳ” аъзолари томонидан фойдаланиладиган пейжерлар ва бошқа электрон қурилмалар портлади. 40 дан ортиқ одам ҳалок бўлди, 3 мингдан ортиқ киши жароҳат олди.

Симсиз қурилмаларнинг портлашлари Исроил томонидан 27 сентябрь куни “Ҳизбуллоҳ” ҳаракати раҳбари Ҳасан Насруллоҳ ўлдирилган Ливанга ракета ҳужумларидан олдин содир бўлган.

“Ҳизбуллоҳ” ҳаракати воқеада Исроилни айблади, бироқ мамлакат Президенти Ицхак Герцог Ливандаги электроника портлашига алоқадорлигини рад этди.

ОАВ ҳужум тафсилотларини ошкор қилди

Америка ва араб оммавий ахборот воситалари тез орада ҳужум тафсилотларини ошкор қилди. “The Washington Post” газетаси 2015 йилда Ливанда биринчи миналанган радиолар пайдо бўлгани, Исроил разведка хизмати “Моссад” эса 2022 йилдан буён пейжерларни портлатиш бўйича операция тайёрлаётгани ҳақида хабар берди.

“Reuters” агентлиги манбаларга таяниб, Ливандаги пейжерларнинг портлашига махсус батареялар сабаб бўлганини хабар қилди. Уларда кичик, аммо кучли пластик портловчи заряд ва рентген нурларига кўринмайдиган детонатор бор эди.

Пейжерларнинг ўзлари шундай қилинганки, хабарларни ўқиш учун уларни икки қўл билан олиш керак эди.

“Оқибатда қурилмалар портлатилганда, уларнинг кўплаб эгалари қўлларидан жиддий жароҳат олди ва 500 га яқин “Ҳизбуллоҳ” аъзоси кўрмай қолди”, деб хабар берди Саудиянинг “Al-Hadath” интерактив ахборот канали.