Нетаньяху Эронга янги зарбалар бериш учун Трампга ҳар куни қўнғироқ қилмоқда – FT

Исроил Бош вазири Бинямин Нетаньяху АҚШ Президенти Дональд Трампга ҳар куни қўнғироқ қилиб, Эронга қарши ҳарбий зарбаларни қайта бошлашга ундамоқда. Бу ҳақда муҳокамалардан хабардор дипломатга таяниб, “Financial Times” нашри хабар берди.

“Нетаньяху унга ҳар куни қўнғироқ қилиб, урушни қайта бошлашга чақирмоқда. Оқ уй ичида ҳам, ундан ташқарида ҳам урушни истамайдиганлар бунга қарши ҳаракат қилмоқда. Минтақа етакчилари Трампга вазиятни кескинлаштирмаслик ва музокараларга устувор аҳамият беришни айтмоқда”, деган манба.

Исроилдаги вазиятдан хабардор яна бир манба Нетаньяху Эронга қарши ҳарбий ҳаракатларни қайта бошлаш тарафдори эканини тасдиқлаган. Бироқ унинг айтишича, ҳозирда Исроил Бош вазири Трампни бунга фаол равишда кўндиришга уринмаяпти. Оқ уй эса бу борада изоҳ беришдан бош тортган.

FT маълумотларига кўра, сайловлар аниқ натижа бермагани сабабли вақтинча бош вазир вазифасини бажаришда давом этаётган Нетаньяху Эрон ҳукуматини ағдариш мақсадида АҚШ ва Исроилнинг янги қўшма зарбаларини амалга ошириш тарафдори. Унинг бу позицияси араб ва мусулмон давлатлари раҳбарларини хавотирга солмоқда. Улар Теҳрон ўз ҳудудларига жавоб зарбалари беришидан қўрқмоқда.

Нашр суҳбатдошларининг айтишича, сўнгги кунларда камида тўрт давлат раҳбари Трамп билан телефон орқали мулоқот қилган. Улар – Саудия Арабистони валиаҳд шаҳзодаси Муҳаммад бин Салмон, БАА Президенти Муҳаммад бин Зоид Ол Наҳаён, Қатар амири Тамим бин Ҳамад Ол Соний ҳамда Туркия Президенти Ражаб Тойиб Эрдўған. Уларнинг барчаси дипломатик музокараларга кўпроқ вақт беришга чақирган.

БАА Президентининг дипломатик маслаҳатчиси Анвар Гаргаш ҳам сиёсий ва дипломатик ечимлар устувор бўлиши кераклигини айтган. Унинг фикрича, айнан шундай ёндашув минтақада янада барқарор мувозанатни таъминлаши мумкин. Шунингдек, Гаргаш АҚШдаги оралиқ сайловлар натижалари Вашингтоннинг можарони тинч йўл билан ҳал қилишга интилишини кучайтиришига умид билдирган.

FT маълумотларига кўра, воситачилар бир неча ҳафтадан бери вақтинчалик келишув бўйича томонлар ўртасидаги келишмовчиликларни бартараф этишга уринмоқда.

“Ҳозир асосий эътибор вазият кескинлашувининг олдини олишга қаратилган. Музокаралар давом этмоқда, бироқ барча саъй-ҳаракатлар кескинликни пасайтиришга йўналтирилгани сабабли янги силжишлар йўқ”, деган Гаргаш.

Эслатиб ўтамиз, аввалроқ АҚШ Президенти Дональд Трамп оралиқ сайловлардан кейин миллий хавфсизлик бўйича маслаҳатчилари билан Эрон масаласига бағишланган илк йиғилишни ўтказганди. Йиғилиш якунида у Эронга қарши кенг кўламли ҳарбий зарбаларни қайта бошлаш ёки бошламаслик бўйича тез орада қарор қабул қилишини билдирган.