Нетаньяху давлат тўнтаришига уринишда айбланди

Олам

−

image

Исроил мухолифати вакиллари Бош вазир Биньямин Нетаньяхуни давлат тўнтаришига уринишда айблади. Бунга унинг идораси октябрь ойидаги сайловлар арафасида араблар етакчилигидаги партия аъзоларини асоссиз айблашга урингани ҳақидаги хабарлар сабаб бўлди. Ўша сайловларда Нетаньяхунинг “Ликуд” партияси мағлуб бўлганди. Бу ҳақда “Al Jazeera” хабар берди. 

Маълумотларга кўра, кеча, 16 ноябрь куни мухолифат етакчиси Яир Лапид ижтимоий тармоқлардаги саҳифасида мазкур ҳолат юзасидан муносабат билдириб, буни давлат тўнтаришига уриниш деб атаган.

“Тафсилотлар ойдинлашгани сайин бир нарса аниқ бўлмоқда: бу шунчаки сайловларга аралашишга уриниш эмас эди. Бу давлат тўнтаришига уриниш бўлган”, деб ёзди у.

Исроилнинг “Channel 12” телеканали 15 ноябрь куни сайлов арафасида Нетаньяху аппарати раҳбари Идо Норден полицияга қўнғироқ қилиб, “Раам” партияси аъзолари устидан шикоят қилгани ҳақида хабар берган.

Норден полиция ходимларини Нетаньяху идорасининг собиқ ходими билан боғлаган. У разведка манбаси сифатида кўрсатилган. Ушбу шахс тақдим этган маълумотлар асосида “Раам” партиясининг уч нафар аъзоси ҳибсга олинган. Бироқ кейинчалик полиция айбловларни асоссиз деб топиб, уларни озод қилган.

Исроилнинг “Haaretz” газетаси ҳам 15 ноябрь куни “Шин Бет” ички хавфсизлик хизмати раҳбари араблар етакчилигидаги “Бирлашган рўйхат” партияси етакчиларининг телефон суҳбатларини тинглашга урингани ҳақида хабар берган. Аммо бош прокурор далиллар етарли эмаслиги сабабли бунга рухсат бермаган.

Исроил полицияси мазкур ҳолат юзасидан қарор қабул қилиш ва маълумот узатиш жараёнини кўриб чиқишини маълум қилди. Нетаньяхунинг “Ликуд” партияси эса тарқалган хабарларни рад этган.

Овоз бериш жараёнидан сўнг Нетаньяху араб партияларини сайловларни сохталаштиришда айблаган эди. Ўшанда мазкур партиялар Кнессетда рекорд даражадаги 19 та ўринни қўлга киритган. “Бирлашган рўйхат” партияси етакчиси Юсуф Жабарин ҳам Нетаньяху ҳаракатларини давлат тўнтаришига уриниш деб баҳолади. У “Шин Бет” билан боғлиқ айбловларни “қора режимларга хос хатти-ҳаракат” деб атади.

“Раам” партияси депутати, полициянинг собиқ раҳбари Йоав Сегаловиц эса зудлик билан тергов ўтказишга чақирди.

“Нетаньяху сайловлар сохталаштирилаётгани ҳақида жар солди. Ваҳоланки, унинг ўзи мамлакатни ўғирлашга уринган ва ҳозир ҳам бунга ҳаракат қилмоқда”, деб ёзди у ижтимоий тармоқларда.

Эслатиб ўтамиз, 8 ноябрь куни Исроил Президенти Ицхак Герцог мухолифат етакчиси Гади Айзенкотга янги ҳукуматни шакллантириш мандатини топширган эди. Унга ҳукмрон коалиция тузиш учун 28 кун вақт берилган.


Мақола муаллифи

Баҳолаганлар

0

Рейтинг

3

Мақолага баҳо беринг

Дўстларингиз билан улашинг