Непал ва Хитой чегарасида даҳшатли сув тошқини бўлди (видео)

Бугун, 26 август куни Непал ва Хитой чегарасида юз берган кучли ва тўсатдан келган сув тошқини ҳамда кўчки аҳоли пунктлари, йўллар, кўприклар ва гидроэнергетика объектларини вайрон қилди. Бу ҳақда “Kathmandu Post” хабар берди.

Багмати провинцияси полицияси маълумотларига кўра, Непалда ҳалок бўлганлар сони 31 кишига етган, 400 га яқин киши бедарак йўқолган деб ҳисобланмоқда.

Офат эрталаб Непалнинг Расува округида, Бхоте-Коси дарёси яқинидаги Сьяпру-Беси ва Тимуре ҳудудларида юз берган. Лой ва сув оқимлари бинолар, автомобиллар ва кўприкларни оқизиб кетган, аҳоли пунктларининг бир қисми қисман сув остида қолган. Хитой давлат ОАВлари Тибет мухтор районининг Гьиронг уездида – кўчки Гьиронг чегара ўтиш жойига ёпирилган ҳудудда Хитой томонидан ҳам кўплаб қурбонлар ва бедарак йўқолганлар борлигини хабар қилган. Тибетдаги қурбонлар ҳақида ҳозирча расмий маълумотлар эълон қилинмаган.

Непал туризм бошқармаси маълумотларига кўра, 384 га яқин сайёҳнинг қаерда эканлиги номаълумлигича қолмоқда. Улар орасида 291 нафар хорижий сайёҳ (шу жумладан 105 нафар Ҳиндистон фуқароси) ва 93 нафар Непал фуқароси бор. Алоҳида хабар қилинишича, Расува муниципалитетида қурилаётган, қуввати 20 МВт бўлган “Лангтанг-Кхола” гидроэлектр станциясининг 60 нафар ходими ҳам йўқолган.

Қутқарув-қидирув гуруҳлари чегаранинг иккала томонида ҳам ишламоқда, бироқ сувнинг юқори даражаси, вайрон бўлган йўллар ва алоқадаги узилишлар операцияларни қийинлаштирмоқда. Сув сатҳи баландлиги сабабли вертолётлар ҳозирча энг кўп жабр кўрган ҳудудларга хавфсиз қўна олмаяпти.

Минтақавий иқлим мониторинги маълумотларига кўра, сув тошқинига Тибетдаги музлик усти кўлининг ёрилиб кетиши сабаб бўлган. Бошқа тахминлар орасида дарё ёки унинг тармоғини тўсиб қўйган муз-тош кўчкиси ва ундан кейин табиий тўғоннинг ёриб ўтилиши ҳам бор.

Сув тошқини йўллар, кўприклар, алоқа ва электр таъминоти тармоқларига зарар етказган. Непал Энергетика вазирлигининг баҳолашича, умумий қуввати тахминан 430 МВт бўлган гидроэнергетика объектлари жабр кўрган – бу мамлакат ўрнатилган гидроэнергетика қувватининг 12 фоиздан ортиғини ташкил қилади.

Непал Бош вазири хавфли ҳудудлардан аҳолини баландликларга эвакуация қилишга топшириқ берган. Ҳокимият органлари ажралиб қолган ҳудудларга кириш қайта тикланганидан кейин ҳалок бўлганлар ва бедарак йўқолганлар сони ортиши мумкинлигидан огоҳлантирмоқда.