НАТО Япония билан янгича ҳамкорлик дастурини ишлаб чиқмоқда

Япония ва НАТО ҳозирда янги ҳамкорлик дастурини ишлаб чиқмоқда, бу орқали Токио альянс билан қатор соҳаларда, жумладан киберхавфсизликда ҳамкорликни кучайтиришга умид қилмоқда. Бу ҳақда Япония Ташқи ишлар вазири Ёсимаса Хаясининг бугун, 5 апрель куни “Politico” нашрида чоп этилган мақоласида сўз борди.

“Япония ва НАТО ҳозирда индивидуал ҳамкорлик дастурини ишлаб чиқмоқда. Ушбу дастур орқали Япония НАТО билан киберхавфсизлик, космик, илғор технологиялар, дезинформацияга қарши кураш каби кўплаб соҳаларда ҳамкорлигини сезиларли даражада мустаҳкамлаш ниятида”, деган вазир.

Ёсимаса Хаясининг айтишича, Европа хавфсизлиги ва Ҳинд-Тинч океани хавфсизлигини энди алоҳида муҳокама қилиб бўлмайди. Бугунги мураккаб ва оғир халқаро хавфсизлик муҳити ҳамкорликни фаоллаштиришни талаб қилади. Бу кайфият НАТОга аъзо давлатлар ва ҳамкор давлатлар орасида кенг тарқалган. Ўтган йили эса томонлар орасидаги ҳамкорлик сезиларли даражада чуқурлашгани қайд этилган.

Вазирнинг таъкидлашича, Япония-НАТО муносабатлари аллақачон ўзини оқлаган ва томонлар қатор соҳаларда катта муваффақиятларга эришган. Мисол тариқасида Хаяси Туркияда НАТО бошчилигидаги зилзила оқибатларини бартараф этиш операциясида иштирок этиш учун Япония мудофаа кучлари самолётлари жўнатилганини келтирган.

Сўнгги пайтларда Япония Шимолий Атлантика альянси билан ҳамкорликни фаол равишда кенгайтирмоқда. Ўтган йили Бош вазир Фумио Кисида НАТО саммитида қатнашган биринчи Япония ҳукумати раҳбари бўлган. Шундан сўнг Япония Ташқи ишлар вазирлиги НАТОга мустақил миссия киритиш, уни Брюсселдаги элчихонасидан ажратиш ва шу орқали миссия мақомини оширишга қарор қилган. Япония Ташқи ишлар вазирининг ўзи ҳам айни дамда Брюсселда бўлиб, у ерда НАТО Ташқи ишлар вазирлари йиғилишида иштирок этмоқда.

Эслатиб ўтамиз, кеча, 4 апрель куни Брюсселда НАТОга аъзо давлатлар ташқи ишлар вазирлари йиғилиши бошланган эди. Биринчи маслаҳатлашувлардан сўнг альянсга янги 31-аъзо Финляндия қўшилгани эълон қилинган, НАТО қароргоҳларида Финляндия байроғи кўтарилган эди.