НАТО Шимолий Корея Россияга аскар юборганини тасдиқлади

НАТО иттифоқчилар Шимолий Корея қўшинларининг Россияга ўтказилиши ҳақидаги маълумотларни тасдиқлади. Бу ҳақда бугун, 23 октябрь куни НАТО матбуот котиби Фараҳ Дахлалла маълум қилди.  

“Агар бу қўшинлар Украинадаги уруш учун мўлжалланган бўлса, бу Шимолий Кореянинг Россиянинг ноқонуний урушини қўллаб-қувватлашининг сезиларли даражада кучайганини ва Россиянинг фронтда сезиларли йўқотишларининг яна бир далилини англатади”, дейди НАТО вакили.

Унинг таъкидлашича, НАТО аъзолари ушбу масала бўйича альянс доирасида фаол маслаҳатлашмоқда ва Жанубий Корея ҳукумати билан вазиятни муҳокама қилмоқчи.

Ўша куни AFP агентлиги АҚШ ҳукумати вакилларидан бирига таяниб, Вашингтоннинг сўзларига кўра, “Шимолий Кореянинг минглаб қўшинлари Россияда машғулот ўтказиш учун бўлганини” хабар қилди.

"АҚШ ҳукумати уларнинг миссияси нима бўлишини ёки Украинада жанг қилишини билмайди. Россия ҳар куни жанг майдонида катта йўқотишларга дучор бўлмоқда", дея қўшимча қилди нашр манбаси.

Унинг сўзларига кўра, агар Москва армия шахсий таркибини кучайтириш учун Пхеньянга мурожаат қилган бўлса, “демак, бу Кремлнинг кучи эмас, умидсизлик белгисидир”.

Бугун, 23 октябрь куни Шимолий Корея қўшинлари Россия ҳудудида мавжудлигини АҚШ Мудофаа вазири Ллойд Остин ҳам тасдиқлаган.

“Бизда Шимолий Корея аскарлари... Россияга кетгани ҳақида далиллар бор. Улар у ерда аниқ нима қилишаётганини вақт кўрсатади. Агар улар бу урушда Россия томонида қатнашмоқчи бўлса, бу жуда жиддий муаммо. Ва бу нафақат Европа учун оқибатларга олиб келади. Бу Ҳинд-Тинч океани минтақасидаги вазиятга ҳам таъсир қилади”, дейди Пентагон раҳбари “The Washington Post” веб-сайтида эълон қилинган видеода.  

Бугун, 23 октябрь куни Жанубий Кореянинг “Yonhap” ахборот агентлиги Миллий разведка хизмати маълумотларига кўра, КХДРдан ҳозиргача Украинага қарши урушда уни қўллаб-қувватлаш учун Россияга 3000 га яқин аскар юборилгани ҳақида хабар берди.  

“Декабрь ойигача Пхеньян ушбу мақсадлар учун Россияга жами 10 минг аскар юборишни режалаштирмоқда”, дейилади мақолада.

Эслатиб ўтамиз, 21 октябрь куни Нью-Йоркда БМТ Бош ассамблеяси ишчи гуруҳи йиғилишида Шимолий Кореянинг доимий вакили Ким Сонг унинг мамлакати ўз аскарларини Украинага қарши урушда қатнашиш учун Россияга жўнатгани ҳақидаги хабарларни рад этиб, бундай маълумотни “асоссиз миш-мишлар” деб атаганди.