Наманганда сўконғич ҳоким ишдан олинди

Наманган вилоятидаги Янги Наманган тумани ҳокими сифатида ишлаб келаётган Жобир Шарифович Абдуллаев лавозимидан озод қилинди. Унинг ўрнига Адҳам Жакбаралиевич Қорабоев ҳоким этиб тайинланди. Бу ҳақда вилоят ҳокимлиги матбуот хизмати хабар берди. 

Маълум қилинишича, бугун, 29 декабрь куни халқ депутатлари Янги Наманган тумани кенгашининг навбатдан ташқари сессияси бўлиб ўтган. Унда ташкилий масала кўрилган. 

Сессияда Наманган вилояти ҳокими Шавкатжон Абдураззоқов кун тартибидаги масала юзасидан маъруза қилган. Вилоят раҳбари кейинги йилларда Янги Наманган туманида олиб борилган ишлар, эришилган ютуқлар баробарида, ишга солинмаган имкониятлар ҳақида тўхталиб, одамларнинг бугунидан рози бўлиб яшашларига эришиш учун амалга оширилиши лозим бўлган долзарб вазифаларни белгилаб берган. 

Сессияда депутатлар Наманган вилояти ҳокимининг Жобир Шарифович Абдуллаев ни Янги Наманган тумани ҳокими  вазифасидан озод қилиш ва туман кенгашининг депутатлик ваколатини муддатидан олдин соқит қилиш ҳақидаги қарорларини тасдиқлаган.

Шунингдек,  вилоят ҳокимининг Адҳам Жакбаралиевич Қорабоевни Янги Наманган тумани ҳокими этиб тайинлаш тўғрисидаги қарори бир овоздан маъқулланган. 

Эслатиб ўтамиз, 2022 йилда ижтимоий тармоқларда Янги Наманган тумани ҳокими Жобир Абдуллаев тадбиркорни сўккани акс этган аудиоёзув тарқалганди. Ўшанда ҳокимга ҳайфсан қўлланилган. Бироқ унинг бугунги ишдан олинишига нима сабаб бўлгани жамоатчиликка маълум эмас.