Нью-Йоркнинг янги мэри илк бор Қуръон билан қасамёд қилди (видео)

north_east

У ким? Ҳинд, мусулмон, африкалик ва рэпер Зоҳран Мамдани

Бугун, 1 январга ўтар кечаси Зоҳран Мамдани Қуръонга қўл қўйган ҳолда очиқ тарзда қасамёд келтиргач, расман Нью-Йорк мэри лавозимига киришди. Бу ҳақда “New York Times” хабар берди.

Нашрга кўра, ярим тунда бўлиб ўтган қасамёд маросимида Зоҳран Мамдани исломнинг муқаддас китоби – Қуръонга қўл қўйган. Шу тариқа у Нью-Йорк тарихида буни амалга оширган илк мэрга айланди.

“Қуръон нусхаларидан бири Мамданининг бобосига тегишли бўлган. Яна бир нусха эса ёзувчи ва тарихчи Артуро Шомбурники бўлган. Ушбу Қуръон Нью-Йорк жамоат кутубхонаси томонидан мэрга тақдим этилди”, дейилади хабарда.

Кейинги очиқ маросим учун у бобосининг Қуръони ва бувисининг Қуръонидан фойдаланишни режалаштирмоқда.

Эслатиб ўтамиз, жорий йил ноябрь ойида Нью-Йорк мэри сайловларида 34 ёшли демократик социалист, штат қонунчилик мажлиси аъзоси Зоҳран Мамдани кутилмаган тарзда ғалаба қозонди. У сайловчиларига бепул ва тезкор автобуслар жорий этиш, муниципал озиқ-овқат дўконлари тармоғини яратиш, умумий мактабгача таълимни йўлга қўйиш ҳамда ижара ҳақи тартибга солинган квартираларда яшовчи қарийб 2 миллион шаҳар аҳолиси учун ижара тўловларини музлатиб қўйишни ваъда қилган. Мамдани Нью-Йорк тарихида мусулмон бўлган ва келиб чиқиши жанубий осиёлик илк сиёсатчи сифатида мэр лавозимини эгаллади.

Мамлакат Президенти Доналд Трамп Зоҳран Мамданини “коммунистик жинни” ва “вақти келиб юз берадиган фалокат” деб атаган. Мамданининг ўзи эса шаҳар манфаатлари йўлида Трамп билан ҳамкорлик қилишга уриниши, бироқ ўзини қўрқитишга йўл қўймаслигини билдирган.

Кейинроқ Зоҳран Мамдани Оқ уйнинг Овал кабинетида Дональд Трамп билан учрашди. Учрашув давомида Трамп бир неча бор Мамданининг қўлини дўстона ушлаб, уни елкасидан қоқиб турган.