Нью-Йоркда кучли ёнғинлар ортидан фавқулодда ҳолат эълон қилинди (видео)

АҚШнинг Нью-Йорк штати губернатори Кэти Хокул Лонг-Айлендда бир нечта кучли ёнғин ўчоқлари аниқлангани сабабли ҳудудда фавқулодда ҳолат режими жорий этилганини эълон қилди. Бу ҳақда у ўзининг Х саҳифасида маълум қилди.

Билдирилишича, кучли шамол таъсирида тез тарқалаётган ёнғинлар сабабли NY 27 автомагистрали ёпилган. Мазкур йўл Лонг-Айлендни Нью-Йоркнинг бошқа ҳудудлари билан боғлаб туради. Тутун бутун ҳудуд бўйлаб тарқалган.

Маҳаллий ҳокимият маълумотларига кўра, ёнғин камида икки бинони вайрон қилган, улардан бири Фрэнсис Габрески аэропорти яқинида жойлашган. Аэропорт ходимлари вақтинча эвакуация қилинган. Ёнғинни ўчириш жараёнида бир нафар ўт ўчирувчи жароҳат олиб, иккинчи даражали юз куйишлари билан шифохонага етказилган. Ҳозирча аҳолини эвакуация қилиш бўйича қарор қабул қилинмаган.

Шу билан бирга, об-ҳаво маълумотларига кўра, шамол давом этиши ва ҳатто кучайиши кутилмоқда.

“Бу бир неча кун давом этиши мумкин ва ёнғин ҳозирда ёнаётган ҳудудлардан чиқиб, яшаш жойларига ҳам тарқалиши ҳеч гап эмас”, дея огоҳлантирди губернатор Хокул CNN телеканалига берган интервьюсида.

Ёнғин ўчоқларидан энг яқин уй-жой массивигача тахминан 4 км масофа бор.
 
Эслатиб ўтамиз, аввалроқ Япониянинг Ивате префектураси Офунато шаҳридаги ўрмон ёнғинлари оқибатида 80 дан ортиқ уй зарар кўрган эди. Шунингдек, шаҳар ҳокимияти 3300 га яқин одамни эвакуация қилиш тўғрисида буйруқ берган.