“Навбаҳор” бош мураббийи Канчельскис лавозимидан четлатилди
Спорт
−
23 Июнь 2019 5382
Наманганнинг “Навбаҳор” клуби бош мураббийи Андрей Канчельскис қониқарсиз натижалар сабаб ўз лавозимини тарк этадиган бўлди.
QALAMPIR.UZ мухбирининг хабар беришича, кеча, 22 июнь куни клуб раҳбарияти навбатдан ташқари йиғилиш ўтказди. Йиғилишда “Навбаҳор” клубининг охирги пайтда кўрсатаётган натижалари муҳокама қилинди.
Хабарингиз бор, жамоа Суперлигада охирги тўртта турдан буён ғалаба қозона олмаяпти. Қолаверса, кубок доирасида “Насаф” клубига йирик ҳисобда мағлубиятга учрашди. Бу натижалар инобатга олиниб, "Манчестер Юнайтед" клуби собиқ футболчиси, россиялик мутахассис Канчельскис бош мураббийликдан четлатилди.
Маълумот учун, “Навбаҳор” бугун, 23 июнь куни Ўзбекистон Суперлигасининг 12-тури доирасида, ўз майдонида “Бухоро” клубини қабул қилади. Айнан шу учрашувдан кейин наманганликларга янги бош мураббий тайинланиши кутилмоқда.
Live
Барчаси
