МЮ Кэррикни истеъфога чиқаришни кўриб чиқмоқда – ОАВ

Англиянинг “Манчестер Юнайтед” клуби раҳбарияти бош мураббий Майкл Кэррикни истеъфога чиқаришни кўриб чиқмоқда. Бу ҳақда “The Guardian” нашри хабар берди.

Таъкидланишича, ҳозирча якуний қарор қабул қилинмаган. Нашр маълумотига кўра, Кэррик жамоани тарк этган тақдирда, унинг ўрнини эгаллаш учун асосий номзод “Ньюкасл Юнайтед”нинг собиқ бош мураббийи Эдди Хау ҳисобланади. АҚШ терма жамоасининг амалдаги бош мураббийи Маурисио Почеттино ҳам номзодлар қаторида кўриб чиқилмоқда.

“Манчестер Юнайтед” 10 та учрашувдан сўнг 8 очко жамғарган ҳолда турнир жадвалида 18-ўринда бормоқда. Жамоа кейинги турда жорий йилнинг 22 ноябрь куни сафарда “Ливерпуль”га қарши майдонга тушади.

Айни дамда “Манчестер Юнайтед” 40 йиллик энг ёмон натижасини такрорлаб, турнир жадвалининг қуйи қисмида, Чемпионшипга тушиб кетадиган зонада бормоқда. 

Маълумот учун, 45 ёшли Кэррик жорий йилнинг январь ойида “Манчестер Юнайтед” бош мураббийи этиб тайинланган. Унга қадар икки марта жамоада вақтинчалик бош мураббий вазифасини бажарган: 2018 йилда Жозе Моуриньо кетганидан кейин ва 2021 йилда мураббийлар штабида фаолият юритган Оле-Гуннар Сульшер истеъфога чиқарилганидан сўнг.

2022 йилдан 2025 йилгача Кэррик “Мидлсбро” бош мураббийи бўлиб ишлаган. У футболчилик фаолияти давомида “Манчестер Юнайтед” билан беш марта Англия чемпионлигини, Чемпионлар лигаси, Европа лигаси ва клублар ўртасидаги Жаҳон чемпионатини қўлга киритган.

Жорий йилнинг май ойида “Манчестер Юнайтед” Кэррик билан шартномани 2028 йилгача узайтирган эди.